سوال: السلام علیکم، مفتی صاحب !‎
ایک سوال عرض خدمت ہے، مہربانی فرما کر اس کا جواب عنایت فرمائیں۔
کسی دوسرے ملک سے آن لائن کوئی چیز اس شرط کے ساتھ خریدی گئی کہ اگر کسی بھی وجہ سے دو مہینے کے اندر وہ چیز بذریعہ ڈاک خریدار کے گھر تک نہ پہنچ سکی یا ڈاک میں کھو گئی، تو بیچنے والا خریدار کو پوری رقم واپس کرے گا، اور اگر وہ چیز بعد میں خریدار کو مل بھی جاتی ہے تو بھی ( معاہدے کے مطابق ) خریدار کسی رقم کا ذمہ دار نہ ہوگا۔
اب خریدار کچھ خریدتا ہے اور وہ چیز ڈاک میں کھو جاتی ہے اور دو مہینے بعد بھی خریدار کے گھر نہیں پہنچتی اور نہ ہی پوسٹ کی ٹریکنگ میں ملتی ہے، چنانچہ خریدار رقم کی واپسی کا مطالبہ کر دیتا ہے اور نتیجتا دوکاندار بھی وعدے کے مطابق مکمل رقم واپس کردیتا ہے، لیکن کچھ مدت بعد وہ چیز خریدار کے گھر بذریعہ ڈاک پہنچ جاتی ہے۔
اب ممکن ہے کہ خریدار کو اس کی ضرورت باقی نہ رہی ہو یا اس نے متبادل چیز کسی دوسری جگہ سے خرید لی ہو، اس صورت حال میں کیا خریدار کے لیے اس چیز کو رکھ لینا یا استعمال کرنا جائز ہوگا یا دوکاندار کو دوبارہ رقم دینی چاہیے؟
واضح رہے کہ بذریعہ ڈاک اس چیز کو واپس بھیجنا ممکن نہیں، اور امکان اسی بات کا ہے کہ دوکاندار نے اس نقصان کا ہرجانہ اپنی انشورنس کمپنی سے لے لیا ہوگا۔
جزاك اللهُ خيرًا

جواب: سوال میں ذکر کردہ صورت کے مطابق، چونکہ بائع اور مشتری کے درمیان معاہدہ ہوا تھا کہ خریدی ہوئی چیز، خریدار کے سپرد کرنے کی مدت دو ماہ ہوگی، دو ماہ میں خریدی ہوئی چیز، خریدار کو نہ پہنچی تو یہ معاملہ ختم ہو جائے گا اور بائع اس کی قیمت واپس کرنے کا پابند ہوگا، لہذا حسب معاہدہ جب یہ معاملہ ختم ہو گیا، تو اگر اس کے بعد وہ چیز موصول ہوتی ہے، اس چیز کا سابقہ معاملے کے ساتھ کوئی تعلق نہیں ہے، لہذا یہ چیز سابقہ خریدار کے پاس امانت ہوگی، اگر اس کی ضرورت ہو تو اس کی قیمت بیچنے والے کو بھیج کر استعمال کرنا جائز ہے، ورنہ اس کو واپس کردینا ضروری ہے۔