سوال: السلام علیکم،
مشترکہ خاندانی رہائشگاہ میں ایک چھت کے نیچے رہتے ہوئے، بھائیوں یعنی دیوروں اور بھابیوں کے مابین شرعی پردہ کرنے کی حدود اور فریقین کے لئے اس کا عملی طریقہ کار کیا ہو گا؟ خصوصاً ضرورت پڑنے پر مخاطب کرنے، ساتھ مِل کر کھانا کھانے، گھر کے اندر نقل و حرکت وغیرہ کے حوالے سے رہنمائی فرمائیں، بہت نوازش ہوگی۔

جواب: واضح رہے کہ مشترکہ گھر میں رہنے والی رشتہ دار نا محرم خواتین، جن کو نامحرم رشتہ دار مردوں سے مکمل پردہ کرنے میں سخت حرج اور مشکل پیش آتی ہو، ان کے بارے میں شریعت میں اتنی گنجائش ہے کہ وہ خواتین اپنے سر پر بڑی چادر اس طور پر لپیٹ لیا کریں کہ سوائے چہرے کے باقی جسم  ڈھک جائے، البتہ اس کا اہتمام ضرور کرنا چاہیے کہ گھر کے نامحرم مردوں کے ساتھ نہ تنہائی ہو اور نہ بلاضرورت گفتگو ہو۔
نیز ایک ہی دسترخوان پر کھانا کھاتے ہوئے بھی پردے کا اہتمام ضروری ہے، لہذا آپس میں اختلاط کرنا، نامحرم مرد وعورت کا ایک دوسرے کے آمنے سامنے بیٹھ کر کھانا کھانا درست نہیں ہے، بلکہ نامحرم مردوں کے دسترخوان لیے علیحدہ جگہ مخصوص ہونی چاہیے۔
(ماخوذ از ویب سائٹ دارالافتاء: جامعہ علوم اسلامیہ علامہ محمد یوسف بنوری ٹاؤن
فتوی نمبر : 143703200008، باضافہ و تصرف یسیر)