سوال: السلام علیکم، مفتی صاحب !
عرب امارات میں دکانوں پر جو مرغی کا گوشت ملتا ہے وہ کمپنی کی پلاسٹک کی تھیلی میں پیک ہوتا ہے اور مختلف ممالک سے درآمد شدہ ہوتا ہے، اس پر حلال کی مہر بھی لگی ہوتی ہے، لیکن میں نے سنا ہے کہ یہ مرغیاں مشین کے ذریعے ذبح ہوتی ہیں، اور مشینی ذبیحہ حرام ہے۔
کیا یہ بات درست ہے، براہ کرم تفصیلی جواب عنایت فرمائیں؟

جواب: واضح رہے کہ مشینی ذبیحہ میں مندرجہ ذیل خرابیاں پائی جاتی ہیں، جس کی وجہ سے اس کا کھانا حلال نہیں ہے، اگرچہ اس پر حلال ہونے کا سرٹیفیکٹ موجود ہو۔
(1) بعض مذبح خانوں میں ذبح سے پہلے مرغیوں کو بجلی کے کرنٹ والے پانی میں غوطہ دیا جاتا ہے، جس کو stunning کہا جاتا ہے، جس کی وجہ سے ذبح ہونے سے پہلے ہی موت واقع ہونے کا اندیشہ ہوتا ہے، جبکہ بعض ماہرین کا خیال ہے کہ اس کرنٹ کے نتیجے میں بہت سی مرغیوں کی دل کی حرکت رک جاتی ہے۔
(2) اکثر اوقات اس مشین میں لگی ہوئی گھومنے والی چھری مرغی کی گردن کی رگوں کو کاٹنے کے لیے کافی ہوجاتی ہے، جبکہ بعض اوقات اس مرغی کی گردن اس چھری تک پوری نہیں پہنچ پاتی، جس کے نتیجے میں مرغی کا گلا یا تو بالکل نہیں کٹتا، یا تھوڑا بہت کٹ جاتا ہے اور کچھ رگیں کٹنے سے رہ جاتی ہیں۔
(3) مشینی ذبیحہ کی صورت میں ذبح کا عمل عام طور پر اتنی تیزی کے ساتھ ہوتا ہے کہ ہر مرغی پر الگ الگ بسم اللہ کہنا ممکن نہیں ہوتا ، اور مشین اسٹارٹ کرتے وقت ایک مرتبہ تسمیہ اس طرح کہنا کہ شروع میں ایک مرتبہ بسم اللہ کہہ دی جائے، اور اس کے بعد گھنٹوں تک مرغیاں کٹتی رہیں، یہ طریقہ شرعی تقاضہ کو پورا نہیں کرتا ہے۔
(4) جس گرم پانی سے مرغیوں کو گزارا جاتا ہے، اس میں یہ اندیشہ ہوتا ہے کہ جن مرغیوں کی گردن بالکل نہیں کٹیں، یا جن کی ناقص کٹی ہیں، اس گرم پانی میں سے گزارنے کی وجہ سے ان مرغیوں کی موت واقع نہ ہوجائے۔
مزید تفصیل کے لیے ملاحظہ فرمائیں (فقہی مقالات: ج:4، ص: 253-281)