سوال: السلام علیکم،
مفتی صاحب !خریدار بیعانہ دے کر پلاٹ خریدنے کا معاہدہ کرتا ہے، بعد میں پلاٹ خریدنے کا معاہدہ ختم کر دیتا ہے۔
اس صورت میں کیا پلاٹ بیچنے والا بیعانہ کی رقم بطور جرمانہ اپنے پاس رکھ کر کسی فلاحی کام میں لگا سکتا ہے؟ بصورت دیگر اکثر خریدار بیچنے والے کے اس طرز عمل کی وجہ سے بیعانہ دے کر کر پلاٹ رکھوالیں گے اور بعد میں نہیں خریدیں گے۔
جزاک اللہ خیرا

جواب: واضح رہے کہ پلاٹ کی بیع ہونے کے بعد خریدار کی طرف سے پیشگی رقم، جو بیعانہ کے نام سے دی جاتی ہے، وہ اس پلاٹ کی طے ہونے والی قیمت ہی کا جزوی حصّہ ہوتی ہے، لہذا اگر کسی وجہ سے سودا کینسل ہو جائے، تو اس رقم کو ضبط کرنا جائز نہیں ہے، بلکہ وہ رقم خریدار کو واپس کرنا شرعاً ضروری ہے۔
رہا یہ سوال کہ پلاٹ بیچنے والے کو سودا کینسل ہونے کی صورت میں نقصان ہوتا ہے، تو ایسی صورت میں بائع کے لئے گنجائش ہے کہ سودا کینسل نہ کرے، بلکہ خریدار کو پلاٹ کی مکمل قیمت ادا کرنے پر مجبور کرے، کیونکہ سودے کو ختم اور فسخ کرنے کے لیے دونوں جانب کی رضامندی ضروری ہے، لیکن اگر وہ کسی طریقہ سے بھی سودا باقی رکھنے اور بقیہ پیمینٹ کرنے پر مجبور نہ کیا جا سکے تو ایسی صورت میں ممکنہ حل کے طور پر یہ صورت اختیار کی جاسکتی ہے کہ یا تو خریدار ہی کوئی دوسرا خریدار مہیا کر دے، یا پھر پلاٹ فروخت کرنے والا خریدار کی طرف سے وکیل بن کر کسی دوسری پارٹی کو فروخت کردے، اور اس طرح اپنی پوری رقم وصول کر کے باقی اس خریدار کے حوالے کر دے، یہاں یہ بات ذہن نشین رہے کہ اس دوسرے سودے میں جو بھی نفع یا نقصان ہوگا، وہ خریدار ہی کا ہوگا، بائع چونکہ وکیل ہے، لہذا اس کا اس دوسرے معاملے سے تعلق نہیں ہوگا۔
مزید واضح رہے کہ اگر سودا کینسل کرنے پر دونوں فریق راضی ہو جائیں، تو اس پلاٹ کی خریدوفروخت کے مراحل پر ہونے والے حقیقی اخراجات مثلاً: فیس یا دیگر قانونی مراحل کے اخراجات کی عرف کے مطابق بیعانہ سے کٹوتی کی گنجائش ہے۔