سوال: السلام علیکم، مفتی صاحب ! ایک شخص نے منت مانی کہ اگر میرے گھر لڑکے کی ولادت ہوئی تو اس کا نام محمد رکھوں گا، تو اب کیا محمد کے ساتھ کچھ اور نام بھی رکھ سکتا ہے یا محمد نام رکھنا ہی ضروری ہے؟ اور اگر محمد نام کے ساتھ کچھ اور بھی نام رکھ لیا تو کیا منت ٹوٹ جائے گی اور اس وجہ سے کوئی کفارہ لازم آئے گا؟

جواب: واضح رہے کہ منت کے لازم ہونے کی چند شرائط ہیں، جن کا پایا جانا شرعا ضروری ہے:
(1) منت اللہ کے نام کی مانی جائے، غیر اللہ کے نام کی منت مانگنا صحیح نہیں ہے۔
(2) منت صرف عبادت کے کام کے لیے ہو، پس جو کام عبادت نہیں، اس کی منت بھی صحیح نہیں ہے۔
(3) جس عبادت کی منت مانی جارہی ہو، وہ عبادت مقصودہ ہو، یعنی اس طرح کی عبادت کبھی فرض یا واجب ہوتی ہو، جیسے: نماز، روزہ، حج، قربانی وغیرہ، پس ایسی عبادت کہ جس کی جنس کبھی فرض یا واجب نہیں ہوتی ہو، اس کی منت بھی صحیح نہیں ہے۔
صورتِ مسئولہ میں آپ نے جو "محمد" نام رکھنے کی منت مانی ہے، اس میں تیسری شرط نہیں پائی جارہی ہے، لہٰذا یہ منت شرعاً منعقد نہیں ہوئی، پس آپ اپنے بیٹے کا نام رکھنے کے سلسلہ میں آزاد ہیں، چاہیں تو "محمد" نام رکھ لیں، یا "محمد" کے ساتھ کسی اور نام کا اضافہ کرلیں، دونوں صورتیں جائز ہیں، البتہ بہتر یہ ہے کہ آپ اپنے بیٹے کے نام کے ساتھ "محمد" بھی لگا دیں، تاکہ اس نام کی برکات حاصل ہو جائیں۔