سوال: السلام علیکم و رحمۃاللہ و برکاتہ ،حضرت ہمارے ہاں مسجد میں پانی کی 250 مل والی بوتلیں وافر مقدار میں رکھی رہتی ہیں، ان کے ساتھ خالی بوتلیں ڈالنے کے لئے کوڑے کی ٹوکری بھی مسجد کے اندر رکھی رہتی ہے، کیا اس ٹوکری میں دوسرا کچرا، استعمال شدہ ٹشو پیپرز وغیرہ ڈال سکتے ہیں، جبکہ یہ کچرا دان مسجد کی حدود کے اندر ہے؟

جواب: واضح رہے کہ حدیث مبارکہ میں مسجد کو صاف ستھرا رکھنے کی تاکید وارد ہوئی ہے، چنانچہ حضرت عائشہ رضی اللہ عنہا سے مروی ہے:
أمر رسول اللہ صلی اللہ علیہ وسلم ببناء المسجد في الدور، وأن ینَظّف ویطیّب․
(رواہ أبوداود والترمذي وابن ماجة کذا في المشکوٰة: ص69)
لہذا مسجد میں ہر ایسی چیز سے بچا جائے، جس سے مسجد کا تقدس پامال ہوتا ہو، اور صورت مسؤلہ میں مسجد کے ڈسٹ بن چونکہ فقط پانی کی خالی بوتل ڈالنے کے لیے رکھے گئے ہیں، لہذا اس میں مزید اور کوئی چیز نہ ڈالی جائے تو بہتر ہے۔