سوال: السلام علیکم، مفتی صاحب ! ہم ایک ولیمہ کی تقریب میں گئے، وہاں کھانا بھی کھایا اور دستور کے مطابق لفافہ بھی دیا، بعد میں معلوم ہوا کہ جس لڑکے کی شادی تھی، وہ بینک میں ملازمت کرتا ہے، تو کیا ہمارا اس تقریب میں کھانا کھانا جائز تھا، اور اگر جائز نہ تھا تو اب کس طرح تلافی ہو گی؟
مزید یہ بھی واضح فرمائیں کہ اگر رشتہ دار بینک میں ملازم ہو تو اس کے گھر کھانا کھایا جائے یا نہیں، کیونکہ نہ کھانے پر یقیناً ان کی طبیعت پر یہ بات ناگوار گزرے گی اور ترک تعلق کا بھی شدید خطرہ ہے، تو ایسی صورت میں کیا کیا جائے؟

جواب: واضح رہے کہ جو شخص سودی بینک میں براہ راست سودی لین دین کے معاملات کے شعبے میں کام کرتا ہے، اس ملازمت کے علاوہ اس کا کوئی اور حلال ذریعہ آمدن بھی نہیں ہے اور وہ اپنی اسی کمائی سے دعوت ولیمہ کرتا ہے، تو اس میں شرکت کرنا اور دعوت کا کھانا کھانا جائز نہیں ہے، لاعلمی میں جو دعوت کھا لی ہے، اس پر استغفار کرنا چاہیے اور آئندہ ایسے دوستوں اور رشتہ داروں کی دعوت سے مناسب انداز میں معذرت کرلی جائے۔
اور اگر کسی بینک ملازم کا بینک کی آمدنی کے علاوہ کوئی اور جائز و حلال آمدنی کا ذریعہ بھی ہو، یا وہ بینک ملازم براہ راست سودی شعبے میں کام نہ کرتا ہو، مثلاً: بینک میں چوکیدار ہو، ڈرائیور ہو، حکومت کے جائز ٹیکس وصول کرنے کا کام کرتا ہو، چائے وغیرہ بنانے کا کام ہو، تو ایسا شخص اگر دعوت کرے تو اس کی دعوت قبول کرنے کی گنجائش ہے، تاہم احتیاط پھر بھی بہتر ہے۔