سوال: السلام علیکم، مفتی صاحب! کتابوں میں طواف کے سات چکروں میں سے ہر چکر کی الگ الگ دعا لکھی ہوتی ہے، کیا ان دعاؤں کو ہر چکر میں الگ الگ پڑھنا ضروری ہے؟

جواب: واضح رہے کہ طواف کے ہر چکر کی جو دعائیں مشہور ہیں، یہ دعائیں خاص طواف کے وقت آنحضرت صلی اللہ علیہ وسلم سے منقول نہیں ہیں، اس لئے ان دعاؤں کو سنت سمجھ کر پڑھنا درست نہیں ہے، البتہ سنت سمجھے بغیر پڑھنا چاہے تو پڑھ سکتا ہے۔
آنحضرت صلی اللہ علیہ وسلم سے رکن یمانی اور حجر اسود کے درمیان "ربنا اتنا فی دنیا حسنۃ" والی دعا منقول ہے۔
لہذا جس دعا یا ذکر میں خشوع زیادہ ہو، اسی کو پڑھا جائے، بعض حضرات طواف کے دوران چلا چلا کر دعائیں پڑھتے ہیں، جس سے دوسرے لوگوں کو بھی تشویش ہوتی ہے، ایسا کرنا مناسب نہیں ہے، چنانچہ تیسرا کلمہ، چوتھا کلمہ، درود شریف یا کوئی دعا جس میں دھیان لگے، زیر لب پڑھتے رہنا چاہیے۔