سوال: السلام علیکم، مفتی صاحب ! اگر کسی لڑکی کو نکاح کے بعد رخصتی سے پہلے طلاق ہو جائے یا وہ خلع لے لے، تو کیا اس لڑکی پر عدت لازم ہوگی، اور اگر لازم ہوگی، تو کتنے دنوں کی عدت لازم ہوگی؟
مزید یہ بھی رہنمائی فرمائیں کہ حق مھر کا جو وعدہ ہوا تھا، یا اسی طرح لڑکی کو سسرال کی طرف سے جو تحائف اور زیور ملے تھے، ان کا کیا حکم ہے؟

جواب: ١- رخصتی سے قبل طلاق یا خلع کی صورت میں عورت پر عدت واجب نہیں ہوتی۔
٢- رخصتی سے قبل طلاق کی صورت میں شوہر پر نصف مہر کی ادائیگی لازم ہوتی ہے، جبکہ خلع میں عورت شوہر کو مال دے کر اس سے خلاصی حاصل کرتی ہے، بعض اوقات اپنے مہر ہی کو بدل خلع کے طور پر دے دیتی ہے، یا جس مالیت پر فریقین متفق ہو جائیں، اس پر فیصلہ ہوتا ہے۔
٣- لڑکی کو اپنے سسرال والوں کی طرف سے شادی کے موقع پر ملنے والے تحائف اور زیورات اگر بطور ملکیت دیے گئے ہوں، تو وہ لڑکی کی ملکیت ہوں گے اور اگر عاریت کے طور پر دیے گئے ہوں، تو وہ تحائف واپس کرنا ہوں گے، اور اگر ملکیت اور عاریت کی صراحت نہ ہو، تو اس میں بارے میں عرف و رواج کو دیکھا جائے گا، اگر ان کی برادری میں عرف یہ ہو کہ وہ تحائف لڑکی کو بطور ملکیت دیے جاتے ہیں، تو نکاح سے علیحدگی کے موقع پر ان تحائف کی واپسی لازم نہیں ہوگی، اور اگر ان کا عرف و رواج یہ ہو کہ وہ تحائف لڑکی کو بطور عاریت دیے جاتے ہوں، نہ کہ بطور ملکیت، تو ایسی صورت میں نکاح ختم ہونے کے بعد ان تحائف کو سسرال والوں کو واپس کر دینا چاہیے۔