سوال: السلام علیکم، مفتی صاحب! اگر کسی عورت کی عادت چھ دن حیض آنے کی ہو، لیکن اگر کسی مہینے تین یا چار دن خون آکر بند ہو جائے تو کیا وہ اپنی عادت تک انتظار کرے گی یا غسل کرکے نماز پڑھنا شروع کردے، براہ کرم اس بارے میں تفصیل سے وضاحت فرما دیں۔

جواب: واضح رہے کہ حیض کی کم از کم مدت تین دن ہے، اور زیادہ سے زیادہ دس دن ہے،
عام طور پر خواتین کی عادت کے دن مقرر ہوتے ہیں، لیکن اگر کبھی عادت کے دن آگے پیچھے ہو جائیں، تو اسکی چند صورتیں ہیں۔
1)۔ خون جاری ہونے کے بعد تین دن سے کم میں بند ہو جائے، اس صورت میں عورت کو انتظار کرنا چاہیئے کہ کچھ دن وقفے کے بعد دوبارہ نہ شروع ہو جائے، اگر دوبارہ آئے گا، تو مدت حیض میں یہ وقفہ بھی حیض ہی سمجھا جائے گا، اور اگر تین دن سے کم میں بند ہوکر دوبارہ نہ آئے، تو یہ حیض نہیں ہوگا، اور ان دنوں کی نمازیں لوٹائی جائیں گی۔
2)۔خون تین دن سے زیادہ آئے، لیکن عادت سے پہلے بند ہو جائے، اس صورت میں عورت کو عادت تک انتظار کرنا چاہیے، اگر دوبارہ پھر نہیں آیا، تو جب سے بند ہوا اس وقت سے پاک سمجھی جائے گی، اور اس کے بعد جتنی نمازیں رہ گئیں ہیں، وہ تمام قضا کرنی ہوں گی۔
3)۔خون اپنی عادت پر بند ہو، اس کا حکم واضح ہے کہ غسل کرکے نماز پڑھ لیں۔
4)۔خون اپنی عادت سے بڑھ جائے، اس صورت میں اگر دس دن کے اندر اندر خون بند ہوجائے، تو یہ حیض ہی شمار ہوگا، اور سمجھا جائے گا کہ عادت بدل گئی، اگر خدانخواستہ دس دن سے بڑھ جائے، تو عادت سے زیادہ جتنے دن گزرے ہیں، وہ پاکی کے ہی شمار کئے جائیں گے، اور ان تمام دنوں کی چھوٹی ہوئی نمازیں قضا کرنی ہوں گی۔