سوال: السلام علیکم ورحمۃ اللہ وبرکاتہ، ہنڈی کے ذریعے جو پیسے بیرون ملک سے بھیجے جاتے ہیں، ان کے متعلق فرمایئے کہ اس طرح کرنا ٹھیک ہے یا نہیں؟ ہنڈی کے ذریعے پیسے بھیجے جاتے ہیں تو بھیجنے والا ایک فکس رقم کمیشن کے طور پر دیتا ہے، یہ رقم بھیجی جانے والی رقم کے زیادہ یا کم ہونے سے تبدیل نہیں ہوتی، ہنڈی کے ذریعے سے پیسے بھیجنا حکومت کی طرف سے منع ہے۔

جواب: ہنڈی کا کاروبار ملکی وبین الاقوامی قوانین کی رو سے ممنوع ہے، اس لیے رقم کی ترسیل کے لیے جائز قانونی راستہ ہی اختیار کرنا چاہیے، البتہ اگر کسی نے ہنڈی کے ذریعے رقم بھجوائی تو مندرجہ ذیل شرائط کے ساتھ جائز ہے:
  (1)ہنڈی کے کاروبار کرنے والے پر لازم ہو گا کہ جتنی رقم اس کو دی جائے، وہ اتنی ہی رقم آگے پہنچا دے، اس میں کمی بیشی جائز نہیں ہے، البتہ بطورِ اجرت الگ سے طے شدہ اضافی رقم لی جاسکتی ہے۔
(2) عقد (معاملہ)کرنے والوں میں سے کسی ایک کا اسی مجلس میں رقم پر قبضہ بھی ہو۔
اگر ان دو شرطوں میں سے کوئی ایک شرط بھی نہیں پائی گئی، تو پھر ہنڈی کا کاروبار شرعاً درست نہیں ہوگا۔