سوال: رجب کے پہلے دن کا روزہ تین سال کا اور دوسرے دن کا روزہ دو سال کا اور تیسرے دن کا روزہ ایک سال کا اور پھر بقیہ دنوں کے روزے ایک ایک ماہ کا کفارہ ہیں۔(الجامع الصغیر للسیوطی: فضائل شھر رجب، ص،311 ، حدیث نمبر،5051) کیا یہ حدیث درست ہے؟

جواب: واضح رہے کہ رجب کے مہینے میں کسی خاص دن روزہ رکھنے کی کوئی فضیلت کسی معتبر سند سے ثابت نہیں، سوال میں مذکور روایت کی سند میں محمد بن عبداللہ سے لے کر ابو عبداللہ العقیلانی تک روایت کرنے والے راوی مجھول ہیں، حافظ ابن حجر، حافظ ابو اسماعیل ہروی، حافظ ابن رجب حنبلی، علامہ ابن القیم جوزی اور دیگر کئی معتبر، مستند اور حدیث کے نبض شناس محدثین نے ان احادیث کو ناقابل اعتبار قرار دیا ہے، علامہ ابن القیم نے لکھا ہے کہ رجب کے روزوں کی فضیلت والی احادیث من گھڑت ہیں، امام بیہقی جنہوں نے خود یہ احادیث نقل کی ہیں، وہ ان احادیث پر یوں تبصرہ فرماتے ہیں: ’’یہ تمام احادیث منکر ہیں، ان کے ناقل بہت سے مجہول راوی ہیں، اور میں اللہ کی بارگاہ میں ان سے براءت کا اظہار کرتا ہوں‘‘۔