سوال: السلام علیکم ورحمۃاللہ، محترم مفتی صاحب ! عورتیں گھر کے کام کاج کرتی ہیں، زیادہ وقت اس میں گزر جاتا ہے، ایسی نیت بتا دیں کہ یہ وقت بھی عبادت بن جائے، مثلاً برتن، کپڑے،صفائی، سالن روٹی وغیرہ کام کاج میں کیا نیت کریں؟ اور اگر کچھ فضائل ہوں تو وہ بھی بتادیں، بہت مہربانی ہوگی۔ والسلام

جواب: واضح رہے کہ عورت اگر گھریلو امور کی انجام دہی اور اولاد کی تربیت کرنے پر یہ نیت کر لے کہ ان فرائض کو ادا کرنے کا مقصد شوہر کو خوش کرنا اور اللہ کو راضی کرنا ہے، تو عورت کا سارا عمل ثواب بن جاتا ہے، عورت کو گھریلو امور کی انجام دہی پر ملنے والے اجر و ثواب میں سے چند مندرجہ ذیل ہیں۔
(1) حضرت حسن بن سفیان رضی اللہ عنہ نقل کرتے ہیں کہ آپ صلی اللہ علیہ وسلم نے فرمایا (اے عورتوں) کیا تم اس بات پر راضی ہو کہ جب تم میں سے کوئی عورت اپنے شوہر سے حاملہ ہو، اور شوہر اس سے راضی ہو، اس کو ایسا ثواب ملے جیسے اللہ کی راہ میں روزہ رکھنے والے اور شب بیداری کرنے والے کو ثواب ملتا ہے، اور جب اس کو دردِزہ ( labour pain) ہوتا ہے، تو اس کی آنکھوں کی ٹھنڈک کیلیے ایسی نعمتیں چھپا کر رکھی گئی ہیں، جس کی خبر آسمان اور زمین والوں کو نہیں ہے، پس جب وہ وضع حمل (deliver) کر دے، تو اس کے دودھ کے ہر گھونٹ پر اور چوسنے پر ایک ایک نیکی ملتی ہے، اگر (بچے کے سبب) اس کو رات جاگنا پڑے، تو اللہ تعالی کی راہ میں ستر غلام آزاد کرنے کا ثواب ملتا ہے، کیا تمہیں معلوم ہے کہ یہ عورتیں کون ہیں؟ یہ ناز و نعمت سے بسر کرنے والی نیک عورتیں ہیں، جو شوہر کی نافرمانی نہیں کرتیں۔
(2) شوہر کی خدمت کرنا صدقہ ہے۔
(3) عورت کا گھریلو کام کرنے کا ثواب جہاد کے برابر ہے۔