سوال: السلام علیکم، ایک خاتون جو کہ راولپنڈی میں مقیم ہیں، ان کی ملکیت میں سات تولے 8 گرام سونا موجود ہے اور یہ سونا 18 جنوری 2006 سے اب تک موجود ہے، انہوں نے اتنے سالوں میں اس کی زکوٰۃ کی مد میں اب تک 20 ہزار روپے ادا کیے ہیں، وہ خاتون اب تک کے تمام سالوں کی زکوۃ ادا کرنا چاہتی ہیں، آپ اس سلسلے میں رہنمائی فرما دیں گے کہ اب تک ان پر کتنی زکوٰۃ بنتی ہے، جو ان کے ذمہ واجب الادا ہے؟

جواب: صورت مسؤلہ میں اگر مذکورہ خاتون کے پاس 2006 سے سات تولے آٹھ گرام سونا موجود ہے، اور اس کے علاوہ کوئی چاندی یا نقدی وغیرہ نہیں ہے، تو گزشتہ سالوں کی زکوة ادا کرنے کا طریقہ یہ ہے کہ 2006 میں جو سونا موجود تھا، اس کا چالیسواں حصہ زکوۃ کی مد میں نکالا جائے گا، اور اگر زکوۃ ادا کرنے کے بعد مال نصاب سے کم رہ جائے، تو بقیہ سالوں کی زکوۃ لازم نہیں ہوگی، اور اگر زکوۃ ادا کرنے کے بعد بھی نصاب(ساڑھے سات تولے سونا) بدستور موجود ہو، تو پھر جس سال کی زکوۃ ادا کرنے تک نصاب(ساڑھے سات تولے سونا) موجود ہو، اس سال تک کی زکوۃ ادا کرنی ہوگی۔