سوال: السلام علیکم، مفتی صاحب! اگر کسی عورت کو حیض کے علاوہ خون آئے، تو اس صورت میں اس کیلئے نماز روزہ وغیرہ کا کیا حکم ہوگا؟ کیا اس کا حکم بھی حیض ونفاس والا ہوگا؟

جواب: واضح رہے کہ حیض کے علاوہ آنے والے خون کو استحاضہ کہا جاتا ہے، اور استحاضہ کا حکم حیض و نفاس کے حکم کی طرح نہیں ہے، بلکہ استحاضہ والی عورت نماز پڑھ سکتی ہے، روزہ رکھ سکتی ہے، قرآن شریف کو چھو سکتی ہے، اور اس کی تلاوت بھی کرسکتی ہے، مسجد میں داخل ہوسکتی ہے، طواف کر سکتی ہے، شوہر اس کے ساتھ ہمبستری کرسکتا ہے، کیونکہ یہ خون بیماری کا خون ہے، جس کے متعلق آپ صلی اللہ علیہ وسلم نے فرمایا: "کسی رگ کے پھٹ جانے سے یہ خون بہتا ہے، اور یہ حیض نہیں ہے، جب تمہارے حیض کے دن آئیں، تو نماز چھوڑ دو، جب حیض کے دن گزر جائیں، تو غسل کرو اور پھر نماز پڑھو"۔