سوال: السلام علیکم، مفتی صاحب! ہمارے علاقے میں ایک چالیس سالہ عورت ہے، جس نے بچپن سے مردوں کی طرح چال ڈھال اختیار کی ہوئی ہے، ہمیشہ مردوں کی طرح لباس، اور مردوں جیسے بال رکھتی ہے، حالانکہ نماز، روزے کی پابندی بھی کرتی ہے، اور اپنے آپ کو دین دار مردوں کی طرح پیش کرتی ہے، کیا شریعت کی رو سے اس کا یہ عمل صحیح ہے؟

جواب: واضح رہے کہ عورت کو مرد کی اور مرد کو عورت کی مشابہت اختیار کرنا حرام ہے، حضور صلی اللہ علیہ وسلم نے ایسے لوگوں پر لعنت فرمائی ہے۔
حدیث شریف میں آتا ہے:
عن ابن عباس رضی اللہ عنہما قال: لعن رسول اللّٰہ ﷺ المتشبھین من الرجال بالنساء والمتشبھات من النساء بالرجال۔ (رواہ البخاری)
ترجمہ:
حضرت ابن عباس رضی اللہ عنہما سے روایت ہے، فرماتے ہیں کہ رسول اکرم صلی اللہ علیہ وسلم نے عورتوں سے مشابہت اختیار کرنے والے مردوں پر لعنت فرمائی اور مردوں سے مشابہت کرنے والی عورتوں پر لعنت فرمائی ہے۔