سوال: ہماری ایک دور کی رشتہ دار خاتون اپنی بیٹی کیلئے رشتہ دیکھنے گئیں، اور جب ان کو پتا چلا کہ لڑکے کی داڑھی ہے تو انہوں نے کہا: ''مجھے یہ رشتہ منظور نہیں ہے، مجھے تو داڑھی سے نفرت ہے''، اب آپ بتائیں کہ داڑھی کے لیے اس طرح کے الفاظ استعمال کرنا کیسا ہے؟ اور ایسی خاتون کے بارے میں شریعت کا کیا حکم ہے؟

جواب: واضح رہے کہ داڑھی رکھنا حضور اکرم ﷺ اور تمام انبیاء علیہم السلام کی سنتِ مبارکہ ہے اور آپ ﷺ نے اس کے رکھنے کی تاکید فرمائی ہے، لہذا جو شخص یہ کہے کہ "مجھے فلاں سنت سے نفرت ہے" تو وہ سنت کی اہانت کی وجہ سے مسلمان نہیں رہتا، بلکہ دائرہ اسلام سے خارج ہوجاتا ہے۔
پوچھی گئی صورت میں حضور اکرم ﷺ کی سنت کے متعلق مذکورہ الفاظ کہنے سے خاتون دائرہ اسلام سے نکل گئی ہے، لہذا مذکورہ خاتون کے لیے فوراً اپنے اس فعل سے توبہ کرنا اور تجدیدِ ایمان کرنا لازم ہے اور تجدید ایمان کے بعد احتیاطاً تجدید نکاح بھی کرے۔