سوال: مفتی صاحب ! ہم نیوزی لینڈ میں رہتے ہیں، کروناوائرس کی وجہ سے حکومت نے مسجدوں میں یہ نوٹس بھیجا ہے کہ صف میں فاصلے فاصلے سے کھڑے ہوں، یعنی جہاں ایک صف میں مل مل کر دس بندے کھڑے ہوسکتے ہیں، وہاں اب صرف چار بندے کھڑے ہوں، اس صورت میں ہمارے لیے کیا حکم ہے، کیونکہ مسجد سے باہر سیکورٹی بھی ہوتی ہے اور کیمرے سے نگرانی بھی ہوتی ہے؟

جواب: واضح رہے کہ نماز میں صفوں کو سیدھا رکھنا اور حتی الامکان فاصلہ نہ رکھنا سنت مؤکدہ ہے، لہذا عام حالات میں بغیر مجبوری کے قصدا صفوں میں خلا چھوڑ دینا مکروہ ہے۔
نیز موجودہ حالات میں بھی یہی حکم ہے، محض بیماری کے وہم کی وجہ سے صفوں میں خلا چھوڑنا مناسب نہیں ہے، تاہم اگر کسی مقام پر واقعی وبائی صورت حال پیدا ہو جائے، تو ایسی صورت میں وہاں کے مخصوص حالات بتا کر اس صورت کے متعلق شرعی حکم دوبارہ علماء کرام سے معلوم کر لیا جائے۔
البتہ اگر مجبوری کی حالت ہو اور اس سنت پر عمل کرنا ممکن نہ ہو(جیسا کہ سوال میں مذکور ہے)، تو ایسی صورت میں مسجد میں نماز ادا ہو جائے گی اور مجبورا ایسا کرنے کی صورت میں کراہت کا گناہ بھی نہیں ہوگا۔