سوال: السلام علیکم، مفتی صاحب ! ایک شخص کمیٹی (بیسی) کی سرپرستی کرتا ہے اور ہر ممبر سے اس کی کمیٹی نکلنے کے بعد دو ہزار روپے لیتا ہے، اور اس کی یہ وجہ بیان کرتا ہے کہ یہ دو ہزار روپے مختلف اخراجات، مثلاً: ایزی لوڈ وغیرہ کے لیے یا کوئی ساتھ آگے پیچھے ہو جائے یا کوئی ممبر فرار ہو جائے، تو اس کے پاس جانے کے لیے ہے، تو کیا اس شخص کا اس طرح دو ہزار روپے رکھنا شرعاً درست ہے؟
تنقیح:
اس بات کی وضاحت فرمائیں کہ بیسی کی نگرانی کرنے والا شخص شرکاء سے رابطے کرنے کیلئے ایزی لوڈ اور آنے جانے کے خرچہ کے طور پر یہ پیسے رکھتا ہے یا ان خدمات کے عوض اجرت کے طور پر لیتا ہے؟
جواب تنقیح:
رابطے کرنے کیلئے ایزی لوڈ اور آنے جانے کے جو خرچے ہوتے ہیں اس کیلئے وہ پیسے کاٹ لیتا ہے۔

جواب: کمیٹی( بیسی) کی نگرانی کرنے والے شخص کے ہر مہینے شرکاء سے پیسے وصول کرنے اور پہنچانے میں جو اخراجات آتے ہیں، وہ شرکاء سے وصول کئے جا سکتے ہیں، لیکن وہ حقیقی اخراجات ہونے چاہئیں،جو ہر مہینے کم یا زیادہ ہوسکتے ہیں۔جس مہینے جتنا خرچہ ہوا اتنا ہی وصول کیا جاسکتا ہے،اس سے زیادہ نہیں۔
اس سلسلہ میں بہتر یہ ہے کہ شروع میں ہی تمام شرکاء کے علم یہ بات لائی جائے کہ ان انتظامات میں متوقع طور پر اتنے خرچے آ سکتے ہیں،اور ہر مہینے جتنے حقیقی خرچے ہوں گے، صرف وہ ہی وصول کئے جائیں گے، تاکہ بعد میں کسی قسم کے نزاع کی نوبت پیش نہ آئے۔