سوال: حضرات مفتیان کرام سے ایک مسئلہ کی وضاحت مطلوب ہے،
موجودہ وقت میں ہم لوگ زکوۃ کے فنڈ سے کمزور اور غریب گھرانوں میں راشن تقسیم کر رہے ہیں، بعض مرتبہ ایسے لوگ بھی آرہے ہیں، جن کے بارے میں یقینی طور پر یہ معلوم نہیں ہو پا رہا کہ وہ زکوٰۃ کے مستحق ہیں، تو ایسی صورت میں کیا کیا جائے، اگر اس گھر کے کسی نابالغ بچے کو وہ پیکٹ دے دیا جائے، تو زکوة ادا ہو جائے گی؟ آپ وضاحت فرمائے۔

جواب: 1: واضح رہے کہ جن لوگوں کا مستحق زکوۃ ہونا معلوم نہ ہو، وہ لوگ اگر فقیروں کے ساتھ راشن لینے آجائیں، اور اپنے آپ کو فقیر کہلائیں، اگر ان کے بارے میں غالب گمان ہو کہ وہ فقیر ہیں، اور ان کا مالدار ہونا یقینی طور پر معلوم نہ ہو، تو ایسے لوگوں کو زکوۃ کی مد میں سے راشن دینا صحیح ہے، اور اس طرح کرنے سے زکوۃ ادا ہو جائے گی۔
2: نابالغ بچے کو زکوۃ دینا اس کے والد کے مستحق زکوۃ ہونے پر موقوف ہوتا ہے، لہذا اگر بچے کا والد مستحق زکوۃ ہو، اور وہ بچہ اتنا سمجھ دار ہو کہ مال کے قبضہ کو سمجھتا ہو اور مال کو چھوڑ کر ضائع نہ کرتا ہو، تو ایسے بچے کو زکوۃ دینا صحیح ہے، ورنہ ناسمجھ بچے کو زکوۃ دینے سے زکوۃ ادا نہیں ہوتی۔