سوال: السلام علیکم، مفتی صاحب ! میں ایک لے پالک لڑکی ہوں، میرے حقیقی والد نے مجھے اپنے چھوٹے بھائی کو (جو بے اولاد تھے) دے دیا تھا، میرے والد، جنہوں نے مجھے گود لیا تھا ایک سال پہلے فوت ہوگئے ہیں، اب میرے والد کے بھائیوں کا دعوی ہے کہ میرے والد کی جائیداد میں میرا اور میری والدہ کا کوئی حصہ نہیں ہے، کیونکہ میں ان کی حقیقی اولاد نہیں ہوں اور میری (منہ بولی) والدہ ان کی جائیداد سے اس لیے محروم ہوں گی کہ ان سے ان کے مرحوم شوہر کی کوئی اولاد نہیں ہے، لہذا ساری جائیداد ان کے بھائیوں کو ملے گی۔
براہ کرم قرآن و حدیث کی روشنی میں رہنمائی فرمائیں۔

جواب: (1) واضح رہے کہ لے پالک ببٹی حقیقی بیٹی کے حکم میں نہیں ہوتی ہے، لہذا جس شخص نے اس کو گود لیا ہے، اس کے ترکہ میں اس لے پالک کا کوئی حق و حصہ متعین نہیں ہے، ہاں ! البتہ پالنے والا اپنی زندگی میں بطورِ ھدیہ اسے کوئی چیز دے کر اسے مالک بنا سکتا ہے اور اسی طرح اس کے حق میں ایک تہائی ترکہ تک کی وصیت بھی کر سکتا ہے۔

(2) کسی بچی کو پالنے والے کے انتقال کے بعد اس کی جائیداد میں اس کی بیوہ کا حصہ ہوتا ہے، لہذا اگر حقیقی اولاد موجود نہ ہو، تو بیوہ کو حقوقِ متقدمہ (تجہیز و تکفین، وصیت اور قرض) کی ادائیگی کے بعد مرحوم کے کل مال کا چوتھائی حصہ ملے گا۔
مرحوم کے بھائیوں کا مرحوم کی جائیداد میں سے مرحوم کی بیوہ کو اس کا شرعی حق نہ دینا سراسر ظلم ہے، قرآن و حدیث میں ایسے لوگوں کے بارے میں سخت وعیدیں آئی ہیں:
وَتَأْكُلُونَ التُّرَاثَ أَكْلًا لَّمًّاO وَتُحِبُّونَ الْمَالَ حُبًّا جَمًّاO
(سورۃ الفجر، الایۃ)
ترجمہ: اور وراثت کا سارا مال سمیٹ کر (خود ہی) کھا جاتے ہو (اور حصہ داروں کو حصہ نہیں دیتے)۔ اور تم مال و دولت سے حد درجہ محبت رکھتے ہو۔
حضرت سعید بن زید رضی اللہ تعالیٰ عنہ فرماتے ہیں کہ رسول اللہ ﷺ نے فرمایا: جو شخص (کسی کی ) بالشت بھر زمین بھی ظلماً لے گا، قیامت کے دن ساتوں زمینوں میں سے اتنی ہی زمین اس کے گلے میں طوق کے طور پر ڈالی جائے گی۔
(مشكوة المصابيح، ج1، ص254، باب الغصب والعاریة، ط: قدیمی)
ایک اور حدیثِ مبارک میں ہے: حضرت انس رضی اللہ تعالیٰ عنہ فرماتے ہیں : رسول اللہ ﷺ نے فرمایا: جو شخص اپنے وارث کی میراث کاٹے گا، (یعنی اس کا حصہ نہیں دے گا) تو اللہ تعالیٰ قیامت کے دن اس کی جنت کی میراث کاٹ لے گا۔ (مشکوۃ، ج1، ص266، باب الوصایا، الفصل الثالث، ط: قدیمی)
خلاصہ کلام یہ ہے کہ مرحوم کی جائیداد میں مرحوم کی بیوی شرعاََ وارث ہے، البتہ لے پالک بیٹی شرعاً وارث نہیں ہوگی۔