سوال: السلام علیکم، مفتی صاحب ! رہنمائی فرمائیں کہ ایسی زمین جسے شہر سے بہہ کر آنے والے گندے پانی سے بلا اجازت سیراب کیا جاتا ہے، لیکن اس کے علاوہ فصل پر کاشت کے لیے کچھ اخراجات بھی آتے ہیں، تو کیا ایسی زمین پر عشر یا نصف ِعشر ادا کیا جائے گا؟

جواب: ہر وہ زمین کہ جس کو ایسے پانی سے سیراب کیا جائے، جس میں خرچہ آتا ہو، اس میں نصف عشر ہے، اور وہ زمین جس کو سیراب کرنے میں خرچہ نہ آتا ہو، تو اس میں عشر ہے، لہٰذا بارانی زمین اور وہ زمین جس کو نہروں کے ذریعے سے سیراب کیا جائے، ان میں عشر ہے، اور جس زمین کو کنویں اور ایسے تالاب وغیرہ کے ذریعے سیراب کیا جائے، جس میں مؤنت (خرچہ) آتا ہو، تو اس میں نصف عشر ہے، اور اگر آبپاشی دونوں طرح ہو، تو اس میں غالب کا اعتبار ہے۔
صورت مسؤلہ میں اگر زمین کو نالہ کے پانی سے سیراب کرنے میں خرچہ نہ آتا ہو، تو اس صورت میں پیداوار پرعشر واجب ہوگا۔
واضح رہے کہ کھیتی کی تیاری میں جو اخراجات ہوتے ہیں، مثلاً: کھاد، بیج، مزدوری، پانی کا خرچہ وغیرہ، انہیں آمدنی سے منہا نہیں کیا جائے گا، بلکہ مجموعی پیداوار میں سے عشر نکالنا ضروری ہوگا۔