سوال: کیا الکحل ملا پرفیوم لگا کر نماز پڑھنے سے نماز ہو جائے گی؟ اور آج کل جو سینیٹائزر (sanitizer) آرہے ہیں، ان میں بھی الکحل ملا ہوتا ہے، تو کیا اسے استعمال کر کے نماز پڑھنے سے نماز ہوجائے گی یا نہیں؟

جواب: واضح رہے کہ پرفیوم اور sanitizers میں استعمال شدہ الکحل اگر اشربہ اربعہ محرمہ یعنی انگور یا کھجور کی شراب سے بنا ہوا ہو تو وہ ناپاک ہے اور اس کا کسی قسم کا استعمال جائز نہیں ہے، لہذا اگر اس قسم کا پرفیوم یا سینیٹائزر کپڑے یا جسم کے کسی حصہ پر ایک درہم سے زائد لگ جائے تو اسے دھوئے بغیر نماز نہیں ہوگی۔
اور اگر وہ اِن دونوں شرابوں کے علاوہ کسی اور چیز سے ،مثلاً :مکئی ،جوار، بیر، آلو،چاول یا پیٹرول وغیرہ سے بنا ہوا ہو تو اس کا صرف خارجی استعمال جائز ہوگا، یعنی اگر کپڑے یا ہاتھ وغیرہ پر لگ جائے تو وہ جگہ ناپاک نہیں ہوگی، لہذا اگر اس قسم کا پرفیوم یا سینیٹائزر کپڑے یا جسم کے کسی حصہ پر لگ جائے تو اس میں نماز ہو جائےگی۔
آج کل مشاہدہ یہی ہے کہ اکثر پرفیوم ، اسپرے یا sanitizers وغیرہ میں دوسری قسم کا الکحل استعمال ہوتا ہے، لہذا جب تک الکحل کے انگور یا کھجور سے بنائے جانے کا یقین یا غالب گمان نہ ہو تو ایسی صورت میں ان اشیاء کا استعمال اور خرید و فروخت جائز ہے، تاہم اگر یقین یا غالب گمان ہوجائے کہ اس میں انگور یا کھجور کی شراب سے بنا الکحل ڈالا گیا ہے تو پھر اس کا استعمال اور خریدوفروخت جائز نہیں ہوگا۔