سوال: السلام علیکم، مفتی صاحب ! عمرو زید سے (جس کا پکوان سینٹر ہے) کہتا ہے کہ آپ جوڑیا بازار کی فلاں دکان سے جتنے کچے راشن کی ضرورت ہو لے لو، اس کی قیمت میں ادا کردوں گا، بس بعد میں آپ مجھے مثلا: ہر ایک کلو چاول پر دو روپے اضافی دے دینا، تو جناب ! رہنمائی فرمائیں کہ کیا ایسا معاملہ کرنا شرعاً درست ہے؟

جواب: سوال میں ذکر کردہ معاملے کو درج ذیل شرائط کے ساتھ کیا جائے تو جائز ہے۔
١- راشن کی خریداری پر لگنے والا سرمایہ معلوم ہو۔
٢- راشن خرید کر دینے والا سرمایہ کار خود یا اس کا وکیل اس راشن پر حسی طور پر قبضہ کرے، پھر وہ پکوان سینڑ والے کے ہاتھ پر طے شدہ نفع کے ساتھ فروخت کر دے۔
٣- اگر پکوان سینٹر والے کو خریداری کی ذمہ داری سونپی جائے تو ایسی صورت میں آپس میں وکالت کا معاھدہ ہونا چاہیے کہ وہ پکوان سینٹر والا پہلے اپنے مؤکل (سرمایہ کار) کے لیے قبضہ کرے گا اور پھر اپنے لیے خریداری کا قبضہ کرے گا۔ ( دونوں قبضوں میں کتنا فاصلہ ہوگا؟ یہ آپس میں فریقین باہمی رضامندی سے طے کر لیں)۔
٤- اصل معاملہ اس وقت ہوگا جب پکوان سینٹر والا راشن کو اپنے لیے قبضہ کر لے، لہذا اس سے پہلے پہلے فریقین کا معاملہ صرف خریدوفروخت کا وعدہ ہوگا، جس کا ایفاء کرنا دیانتا (تقوی کی رو سے) لازم ہوگا۔
٥- اگر جانبین کے درمیان باقاعدہ وعدے کا معاہدہ طے پاتا ہے، تو اس میں فریقین میں سے دونوں کو یا کسی ایک کو اختیار دینا ضروری ہے کہ وہ کسی وجہ سے اپنے فیصلے کو کالعدم کر کے معاہدے کو ختم کرنا چاہے تو کر سکے، تاکہ وعدہ بیع کی بیع کے ساتھ مشابہت نہ ہو جائے۔