سوال: حضرت مفتی صاحب ! السلام علیکم ،
ایک استفتاء پیش خدمت ہے۔
مسئلہ یہ ہے کہ ایک شخص بسلسلہ کسبِ معاش اپنی فیملی سمیت سعودی عرب میں مقیم ہے، عرصہ بعد انہوں نے اپنی کمائی سے اپنے وطن پاکستان میں ایک مکان خریدا اور اسے کرایہ پر دیدیا، کیا اس مکان پر زکوة کا حکم لاگو ہوگا؟
واضح رہے کہ شخص مذکورہ کی ملکیت میں اس مکان کے سوا کوئی اور مکان نہیں ہے۔

جواب: واضح رہے کہ جو مکان رہائش یا کرایہ پر دینے کے لیے بنایا گیا ہو، تو اس مکان کی مالیت (Value) پر زکوة واجب نہیں ہوتی ہے، البتہ اس مکان سے جو کرایہ حاصل ہوتا ہے، اس پر زکوة اس وقت واجب ہوتی ہے، جب حاصل شدہ کرایہ میں وجوب زکوة کی تمام شرطیں پائی جائیں، مثلاً: سارا کرایہ تنہا یا دوسرے اموال زکوۃ کے ساتھ مل کر نصاب کو پہنچ جائے، اور سال گزرجائے، تو اس کرایہ پر زکوٰة واجب ہوگی۔