سوال: السلام علیکم، مفتی صاحب ! بینک ایک ایسا کریڈٹ کارڈ فری میں بنا کر دے رہا ہے، جس سے آپ ملک میں کہیں بھی خریداری کر سکتے ہیں، اس خریداری کی قیمت بینک اس کریڈٹ کارڈ کے ذریعے خود ادا کرے گا، صارف نے اگر وہ قیمت بینک کو پچاس دنوں کے اندر اندر ادا کی، تو بینک کوئی اضافی رقم نہیں لے گا، لیکن اگر پچاس دنوں کے اندر بینک کو پوری رقم ادا نہیں کی گئی، تو اکاونوے دن اس پر جرمانہ (Penalty) لگ جائے گا، رہنمائی فرمائیں کہ ایسا کارڈ بنوانا جائز ہے یا نہیں؟
نیز یہ بھی بتائیں کہ اسی بینک کی ایک ویب سائٹ ہے، اس ویب سائٹ پر بینک والے اوپر ذکر کیے گئے کارڈ کے حامل کو سامان، مثلاً: موٹر سائیکل، موبائل وغیرہ بالکل مارکیٹ ریٹ پر قسطوں میں بیچتے ہیں، اب اگر میں اپنے دوست کے کارڈ کے ذریعے (اس کا کارڈ بنا ہوا ہے) خریداری کر کے اپنے دوست کو ہر مہینے کی قسط دیتا رہوں، لیکن میرا دوست بروقت قسط جمع نہ کروائے، جس کی وجہ سے میرے دوست پر جرمانہ لگ جائے، تو میرے لیے وہ خریداری ٹھیک ہو گی یا نہیں؟
براہ کرم تفصیل سے رہنمائی فرمائیں۔

جواب: کریڈٹ کارڈ حاصل کرنے کے مروجہ طریق کار میں کارڈ حاصل کرنے والے (Consumers) اور کارڈ جاری کرنے والے ادارے کے مابین سودی معاہدہ شامل ہوتا ہے، اور کریڈٹ کارڈ سے خریداری کی صورت میں بر وقت ادائیگی نہ کرنے پر کارڈ ہولڈر سے ادارہ مدت ادائیگی کے مقابلے میں کچھ اضافی رقم بھی لیتا ہے، جو شرعا سود ہونے کی وجہ سے ناجائز اور حرام ہے۔ چونکہ کریڈٹ کارڈ کے حصول کیلئے سودی معاہدہ کرنا پڑتا ہے، اور بعض صورتوں میں عملاً سود ادا بھی کرنا پڑتا ہے، سودی معاہدہ کرنا/سود ادا کرنا ناجائز اور ایسا معاہدہ جسے ختم کرنا واجب ہے، اس لئے کریڈٹ کارڈ حاصل کرنے اور اسے استعمال کرنے سے اجتناب لازم ہے۔
لیکن اگر کسی جگہ مجبوری ہو، تو درج ذیل تین شرائط کے ساتھ کریڈٹ کارڈ استعمال کرنے کی گنجائش ہے:
1 ڈبیٹ کارڈ میسر نہ ہو یا اس سے ضرورت پوری نہ ہو، اگر ڈیبٹ کارڈ سے ضرورت پوری ہو رہی ہو، تو کریڈٹ کارڈ کا استعمال جائز نہیں۔
2 حامل کارڈ (Card holder) اس بات کا مکمل انتظام کرے کہ معین مدت (Grace Period) سے پہلے پہلے ادائیگی کرلے، تاکہ سود لگنے کی نوبت نہ آئے۔
3 اس کارڈ کو غیر شرعی کاموں میں استعمال نہ کیا جائے۔
نیز اگر حامل کارڈ ان شرائط کا اہتمام کرلے تو اس کے استعمال کی گنجائش تو ہوگی، لیکن چونکہ کریڈٹ کارڈ کے معاہدہ میں سود کی شرط ہوتی ہے، لہذا حامل کارڈ پر لازم ہے کہ وہ سودی معاہدے کرنے پر توبہ و استغفار بھی کرے۔
آپ اپنے دوست کا کریڈٹ کارڈ اوپر ذکر کی گئی تین شرائط کی رعایت رکھتے ہوئے استعمال کرسکتے ہیں، جبکہ آپ کریڈٹ کارڈ کے ذریعہ کی گئی خریداری بقدر بل، سود لگنے کی تاریخ سے پہلے ادا کردیتے ہوں، اس صورت میں آپ اپنی ذمہ داری سے بری ہوجائیں گے۔