سوال: السلام علیکم، مفتی صاحب ! گزشتہ سال چھ تولہ سونا تھا، اس سال وہی چھ تولہ سونا ہے اور کیش بھی ہے، لیکن کیش پر سال نہیں گزرا ہے، رہنمائی فرمائیں کہ زکوة کس طرح ادا کی جائے گی؟

جواب: زکوۃ چونکہ سال میں ایک دفعہ فرض ہے، اس لئے زکوۃ میں سال گزرنے کا مطلب یہ ہے کہ زکوۃ کے نصاب کا مالک ہونے کے بعد مجموعی طور پر ایک سال گزر جائے، تو وہ اپنی زکوۃ کا حساب کرے گا، دوران سال میں کمی بیشی کا اعتبار نہیں ہوگا، اور نہ ہی ہر ہر روپے پر سال گزرنا ضروری ہے، لہذا آپ کی زکوۃ کی جو تاریخ ہے، اس وقت آپ کے پاس جتنے بھی پیسے، سونا، چاندی، اور سامان تجارت ہو، ان سب کو شامل کرکے زکوۃ کاحساب کریں گے، چنانچہ ان سب کو جمع کرنے کے بعد آپ اپنے اوپر واجب الاداء قرضے منہا کریں گے، اس کے بعد دیکھیں کہ باقی اموال زکوۃ (یعنی سونا چاندی، سامان تجارت اور کیش) کتنے بچے؟ اگر ان کی قیمت ساڑھے باون تولہ چاندی کی قیمت کے برابر یا زیادہ ہو، تو آپ پر ڈھائی فیصد کے حساب سے زکوۃ کی ادائیگی لازم ہوگی، اور اگر قرض منہا کرنے کے بعد بقیہ چیزوں کی قیمت ساڑھے باون تولہ چاندی کی قیمت سے کم ہو، تو آپ پر زکوۃ فرض نہیں ہوگی۔