سوال: السلام علیکم، مفتی صاحب ! آج کل کے جو مشکل حالات ہیں ان میں اکثر وہ لوگ جن کا ذاتی گھر ہے، اچھی تنخواہ ہیں، مگر موجودہ حالات میں تنخواہیں نہ ملنے کی وجہ سے کھانے پینے میں تھوڑی بہت مشکلات کا شکار ہیں، تو اس طرح کے لوگ اگر صدقہ یا زکوٰۃ و خیرات کے راشن لے لیں، تو کیا یہ جائز ہے؟

جواب: جس غیر سید مسلمان کے پاس سونا، چاندی، مال تجارت، نقدی یا گھر میں ضرورت اصلیہ (روزمرہ استعمال کی اشیاء) سے زائد سامان ہو، ان پانچوں میں سے بعض یا کل کا مجموعہ یا ان میں سے کسی ایک کی قیمت اگر چاندی کے نصاب (یعنی ساڑھے باون تولہ چاندی) تک نہیں پہنچتی ہے یا نصاب کو تو پہنچتی ہے، لیکن وہ قرض دار ہے، اور قرض منہا کرنے کے بعد وہ بقدر نصاب مالیت کا مالک نہیں رہتا، تو ایسا شخص زکوة کا مستحق ہے۔
واضح رہے کہ اگر کوئی شخص مذکورہ بالا تفصیل کے مطابق مستحق زکوة نہیں ہے، لیکن نقد رقم نہ ہونے کی وجہ سے کھانے پینے اور اہل وعیال کے اخراجات وغیرہ میں تنگی کا سامنا ہے، تو ایسے شخص کو زکوة نہیں دی جاسکتی ہے، البتہ نفلی صدقات کی رقم سے اس کی مدد کرنی چاہیے۔
اللہ تعالی کا ارشاد ہے :
مَثَلُ الَّذِیۡنَ یُنۡفِقُوۡنَ اَمۡوَالَہُمۡ فِیۡ سَبِیۡلِ اللّٰہِ کَمَثَلِ حَبَّۃٍ اَنۡۢبَتَتۡ سَبۡعَ سَنَابِلَ فِیۡ کُلِّ سُنۡۢبُلَۃٍ مِّائَۃُ حَبَّۃٍ ؕ وَ اللّٰہُ یُضٰعِفُ لِمَنۡ یَّشَآءُ ؕ وَ اللّٰہُ وَاسِعٌ عَلِیۡمٌ .
اَلَّذِیۡنَ یُنۡفِقُوۡنَ اَمۡوَالَہُمۡ فِیۡ سَبِیۡلِ اللّٰہِ ثُمَّ لَا یُتۡبِعُوۡنَ مَاۤ اَنۡفَقُوۡا مَنًّا وَّ لَاۤ اَذًی ۙ لَّہُمۡ اَجۡرُہُمۡ عِنۡدَ رَبِّہِمۡ ۚ وَ لَا خَوۡفٌ عَلَیۡہِم وَ لَا ہُمۡ یَحۡزَنُوۡنَ۔
(سورة البقرة : 261-262)
ترجمہ:
جو لوگ اللہ کے راستے میں اپنے مال خرچ کرتے ہیں، ان کی مثال ایسی ہے جیسے ایک دانہ سات بالیں اگائے (اور) ہر بالی میں سو دانے ہوں، اور اللہ جس کے لیے چاہتا ہے ( ثواب میں) کئی گنا اضافہ کردیتا ہے، اللہ بہت وسعت والا (اور) بڑے علم والا ہے۔
جو لوگ اپنے مال اللہ کے راستے میں خرچ کرتے ہیں، پھر خرچ کرنے کے بعد نہ احسان جتلاتے ہیں، اور نہ کوئی تکلیف پہنچاتے ہیں، وہ اپنے پروردگار کے پاس اپنا ثواب پائیں گے، نہ ان کو کوئی خوف لاحق ہوگا اور نہ کوئی غم پہنچے گا۔