سوال: مفتی صاحب ! کسی نے ایک پلاٹ قسطوں پر اس نیت سے لیا کہ جب قسطوں کی مکمل ادائیگی ہو جائے گی تو اس کو بیچ کر اس سے حاصل ہونے والی رقم سے ملکیت میں پہلے سے موجود ایک پلاٹ پر گھر بنوا لوں گا، تو کیا پہلے پلاٹ پر ( جس کو بیچ کر دوسرے پلاٹ پر مکان بنوانا ہے) زکوة واجب ہو گی؟

جواب: واضح رہے کہ قسطوں پر پلاٹ خریدنے سے خریدار اس کا مالک بن جاتا ہے، خواہ پلاٹ پر قبضہ کیا ہو یا نہ کیا ہو اور جو پلاٹ تجارت کی نیت سے خریدا جائے، پھر بعد میں اس رقم سے چاہے گھر بنانے کی نیت ہو، بہرصورت ایسا پلاٹ مالِ تجارت ہے اور اس کی موجودہ قیمت فروخت، اگر نصاب (ساڑھے باون تولہ چاندی کی قیمت) کے برابر یا اس سے زیادہ ہو تو سال گزرنے پر اس کی زکوۃ واجب ہوگی۔
لہذا صورت مسئولہ میں بیچنے کی نیت سے خریدے گئے پلاٹ کی قیمت فروخت پر زکوۃ لازم ہوگی۔