سوال: السلام علیکم، مفتی صاحب !
ایک صاحب، جو کینیڈا میں رہائش پذیر ہیں اور بر سر روزگار ہیں، وہاں انہوں نے ایک مکان مورگیج (رہن) کے ذریعہ لیا ہے، جس کے تحت انہیں بینک کو ایک بڑی رقم ترتیب سے ادا کرنی ہے جس کی ادائیگی میں کچھ سال لگیں گے، تو کیا ان کو زکوٰۃ ادا کرنی ہو گی؟
ان کے پاس پاکستان میں بھی پلاٹ ہے جو انہوں نے بیچنے کی نیت سے خریدا ہے، تاکہ بعد میں بچوں کے کام آ جائے، تو کیا اس پر بھی زکوۃ واجب ہے؟
اگر ہے تو زکوٰۃ کا تخمینہ کس طرح سے لگایا جائے گا؟

جواب: ١- اگر کسی شخص نے اپنا مال کسی کے پاس گروی رکھوایا ہے، تو جب تک وہ گروی رکھا ہوا ہے اس مال پر زکوٰۃ واجب نہیں ہوگی۔
٢- وہ پلاٹ جو بیچنے کی نیت سے خریدا ہے، وہ بھی قابل زکوٰۃ اموال میں شمار ہو کر، اس کی مالیت کو بھی نصاب میں شامل کیا جائے گا۔
٣- زکوٰۃ ادا کرنے کا تخمینہ یہ ہے کہ کل نصاب زکوٰۃ کا ڈھائی فیصد ادا کیا جائے گا۔
نیز واضح رہے کہ اگر صاحب نصاب مقروض ہو اور وہ قرضہ طویل المیعاد ہو، ( یعنی ایسا قرضہ ہو کہ جس کا مطالبہ فوری نہ ہو)، تو کل نصاب زکوٰۃ میں سے صرف اس سال واجب الادا قرضہ (یعنی کل قرضہ میں سے جتنی رقم اس سال اسے ادا کرنی ہے) اتنی رقم منہا کر کے باقی ماندہ نصاب کی زکوٰۃ ادا کی جائے گی۔