عنوان: رمیِ جمرات میں غلطی یا ترک کی صورت میں اعادہ یا دم کا شرعی حکم

سوال: مفتی صاحب! میرے حج کی رمی کے اعتبار سے دو سوالات ہیں، اور یہ دونوں واقعات اسی سال (2026) حج کے دوران پیش آئے ہیں، براہِ کرم ان سوالات کے جوابات عنایت فرما دیں۔
1) ایک شخص نے 10 ذی الحجہ کو جمرۂ کبریٰ کی رمی کے بجائے جمرۂ صغریٰ کی رمی کر لی تو کیا اب اس صورت میں اس شخص پر دم واجب ہوگا یا اس کا اعادہ کرنا ہوگا؟ اور اگر اعادہ کرنا ہوگا تو کب تک اعادہ کر سکتے ہیں؟ نیز اگر اعادہ نہیں کیا تو کیا حکم ہوگا؟
2) ایک خاتون نے 11 ذی الحجہ کو دو شیطانوں کو کنکریاں ماریں اور ایک شیطان کو کنکری نہیں ماری، تو اب اس عورت کے لیے کیا حکم ہوگا؟ کیا اس عورت پر بھی دم واجب ہوگا یا اس کا اعادہ کرنا ہوگا؟ اور اگر اعادہ کرنا ہوگا تو کب تک اعادہ کر سکتے ہیں؟ نیز اگر اعادہ نہیں کیا تو کیا حکم ہوگا؟

جواب: 1] *دس ذی الحجہ کو جمرۂ کبریٰ کے بجائے جمرۂ صغریٰ کی رمی کرنا:*
واضح رہے کہ دس ذی الحجہ کو صرف جمرۂ کبریٰ (جمرۂ عقبہ) کی رمی واجب ہے، اگر کسی شخص نے غلطی سے جمرۂ صغریٰ کی رمی کر لی تو یہ رمی معتبر نہیں ہوگی اور جمرۂ کبریٰ کی رمی اس کے ذمّہ باقی رہے گی، لہٰذا اس پر لازم ہے کہ جمرۂ کبریٰ کی رمی کا اعادہ کرے۔ اگر وہ 11 ذی الحجہ کی صبحِ صادق سے پہلے جمرۂ کبریٰ کی رمی کر لے تو یہ وقتِ ادا کے اندر شمار ہوگی اور اس پر کوئی دم یا صدقہ واجب نہیں ہوگا، البتہ اگر 11 ذی الحجہ کی صبحِ صادق کے بعد اس کی قضا کرے تو رمی ادا ہو جائے گی، لیکن واجب کو اس کے مقررہ وقت سے مؤخر کرنے کی وجہ سے امام ابوحنیفہ رحمہ اللہ کے نزدیک ایک دم واجب ہوگا، جبکہ صاحبین کے نزدیک ایام رمی میں اعادہ کرلینے کی صورت میں دم واجب نہیں ہوگا اور اگر ایامِ رمی (13 ذی الحجہ کے غروبِ آفتاب تک دن ) گزر جائیں اور اس نے جمرۂ کبریٰ کی رمی کا اعادہ نہیں کیا ہو تو اب رمی نہیں ہوسکتی، اب اس صورت میں واجب کے مکمل ترک کی وجہ سے فقہاء احناف کے نزدیک ایک دم واجب ہوگا۔
2] *گیارہ ذی الحجہ کو ایک جمرہ کی رمی چھوڑ دینا:*
گیارہ ذی الحجہ کو تینوں جمرات کی رمی واجب ہے، اگر کسی خاتون نے دو جمرات کی رمی کی اور ایک جمرہ کی رمی نہیں کی تو اس پر لازم ہے کہ ایامِ رمی ختم ہونے سے پہلے اس چھوٹے ہوئے جمرہ کی رمی کر لے۔ اگر اس نے ایام رمی میں اس کی قضا کر لی تو رمی درست ہو جائے گی، تاہم اگر یہ قضا اپنے مقررہ وقت کے بعد کی گئی ہو تو ہر چھوڑی گئی کنکری کے بدلے ایک صدقہ واجب ہوگا۔ اور اگر ایامِ رمی (13 ذی الحجہ کے غروبِ آفتاب تک) گزر جانے کے باوجود اس نے اس جمرہ کی رمی بالکل نہ کی تو چونکہ ترک کی گئی سات کنکریاں اس دن کی کل اکیس کنکریوں کی اکثریت نہیں بنتیں، اس لیے اس پر دم واجب نہیں ہوگا، بلکہ ہر چھوڑی گئی کنکری کے بدلے ایک صدقہ واجب ہوگا، یعنی مجموعی طور پر سات صدقات ادا کرنا لازم ہوں گے۔ صدقہ سے مراد صدقۂ فطر کے برابر مقدار یا اس کی مالیت ہے۔