سوال: کیا فرماتے ہیں علمائے کرام اور مفتیان عظام اس مسئلے کے بارے میں کہ پہلے امام کعبہ جماعت کراتے ہوئے سب سے آگے کعبہ کے سامنے کھڑے ہوتے تھے۔ ان کے اور کعبہ کے درمیان کوئی نہیں ہوتا تھا، لیکن اب امام صاحب پیچھے کہیں کھڑے ہوکر امامت کرتے ہیں۔ مطاف میں مقتدی ہوتے ہیں، امام صاحب نہیں ہوتے؟

جواب: خانہ کعبہ میں مسجد کی حدود میں چاروں طرف کھڑے ہوکر امامت کی جاسکتی ہے، البتہ اتنا خیال رکھنا ضروری ہوتا ہے کہ جس سمت میں امام کھڑا ہو، اس سمت میں امام سے آگے مقتدی کھڑے نہ ہوں، اگر مقتدی اس سمت میں امام سے آگے کھڑے ہوں گے تو مقتدیوں کی نماز نہیں ہوگی اور اگر اس سمت کے علاوہ دوسری سمت سے مقتدی آگے کھڑے ہوں، چاہے مطاف کے اندر ہی کیوں نہ ہوں، تو اس صورت میں آگے بڑھے ہوئے مقتدیوں کی نماز خراب نہ ہوگی۔ واضح رہے کہ مسجد حرام کی انتظامیہ صف بندی میں بھرپور اہتمام کرتی ہے، لہٰذا ہمیں ان پر اعتماد کرکے اپنی نماز بلاتردد امام کے پیچھے ادا کرنی چاہیے۔