سوال: السلام علیکم، مفتی صاحب !
میں نے ایک فلیٹ اس نیت سے بک کیا کہ یا تو اس میں رہائش اختیار کروں گا یا ضرورت پڑنے پر فروخت کردوں گا، تاہم بعد میں کچھ قسطوں کی ادائیگی کے بعد میں نے اپنے دوست کو اس بات پر راضی کیا کہ آگے کی قسطیں وہ بھر دے اور آخر میں میں اس سے اپنے پیسے واپس لے لوں، اب جب کہ فلیٹ اس منزل تک نہیں پہنچا جہاں کا فلور میں نے بک کیا ہے (البتہ وہ نام ہو چکا ہے) تو اس کی زکوة کس طرح ادا کروں؟

جواب: واضح رہے کہ مذکورہ صورت میں کسی پلازہ میں فلیٹ بک کروانا شرعا "عقد استصناع" ہے، جس میں بک کروانے والے (مستصنع) کا اپنے فلیٹ پر باقاعدہ قبضہ ہوجانے سے پہلے وہ فلیٹ، بنانے والے (صانع) کی ملکیت میں ہوتا ہے، بک کروانے والے کی اس میں ملکیت نہیں ہوتی، لہذا فلیٹ پر قبضہ سے پہلے اس کی مالیت پر زکوة لازم نہیں ہوگی، چاہے وہ فلیٹ ذاتی استعمال کیلئے بک کروایا ہو، یا آگے فروخت کرنے کے لیے۔
نیز جو رقم فلیٹ کی قسطوں کے طور پر جمع کروائی گئی ہے، وہ چونکہ بک کروانے والے کی ملکیت سے نکل چکی ہے، اس لئے اس رقم کی زکوة بھی اس پر لازم نہیں ہوگی۔
تاہم فلیٹ پر قبضہ ہونے کے بعد اس کی مالیت پر حسب شرائط زکوٰۃ واجب ہوگی۔
چونکہ سائل کی صراحت کے مطابق، ان کا بک کیا گیا فلیٹ اب تک تعمیر نہیں ہوا ہے، جس وجہ سے اس پر قبضہ بھی نہیں ہوا، اس لیے اس میں ملکیت ثابت نہیں ہوئی ہے، لہذا اس فلیٹ پر موجودہ حالت میں زکوٰۃ واجب نہیں ہے۔