سوال: مفتی صاحب ! اگر کسى غریب عورت کا شوہر لاپرواہ ہو، کام کاج نہ کرتا ہو اور اگر زکوٰۃ کی رقم دى جائے تو فوراً خرچ کر دیتا ہو، تو اگر اس رقم کو کسى دوسرے کاروباری شخص کے پاس کاروبار میں لگوا دیں اور وه رقم اس عورت ہی کے لیے ہو، تاکہ مستقل کچھ مہینہ کا خرچ اس عورت کو ملتا رہے، تو کیا زکوٰۃ ادا ہو جائے گی؟

جواب: واضح رہے کہ زکوٰۃ کی ادائیگی کےلیے ضروری ہے کہ زکوٰۃ کی رقم مستحق زکوٰۃ کو تملیکا یعنی مالک بنا کر دی جائے، تاکہ وہ اپنی مرضی سے اس میں تصرف کرسکے۔
لہذا صورت مسئولہ میں اگر زکوٰۃ کی رقم مستحق خاتون کو مالک بنا کر اس کے قبضے میں دی جائے اور پھر وہ اپنی مرضی سے کاروبار میں لگائے، تو کوئی حرج نہیں ہے، بصورتِ دیگر اگر تملیک نہیں پائی گئی، تو زکوۃ ادا نہیں ہو گی۔