سوال: جناب مفتی صاحب!
السلام علیکم ورحمۃ اللہ وبرکاتہ،
اس وقت ڈاکٹر حضرات کو، جن میں بندہ ڈاکٹر حماد طفیل کے چند متعلقین بھی ہیں، عجیب وغریب صورتِ حال کا سامنا ہے، اور وہ درج ذیل ہے:
وہ ڈاکٹر حضرات جن کو ہسپتال کی طرف سے کورونا وائرس کے مریضوں کو دیکھنا پڑ رہا ہے، ان کو ہسپتال کی طرف سے ہدایت دی گئی ہے کہ وہ اپنی داڑھی منڈوائیں، اگر وہ اپنی داڑھی نہیں منڈوائیں تو( N-95) ماسک پورے چہرے پر مکمل طور پر نہیں لگ پاتا، جس کی وجہ سے قوی اندیشہ ہوتا ہے کہ ڈاکٹر خود اس مرض میں مبتلا ہوکر ہلاک ہوجائے، یا شدید بیمار پڑجائے، حتی کہ دوسروں کو یہ مرض(Covid-19) کے لگنے کا سبب بھی بن سکتا ہے۔
بہت سارے ہسپتالوں (اور پاکستان کے تقریبا سارے ہسپتالوں میں) میں ایسے ماسک جو داڑھی والے حضرات کے بیٹھ جائیں اور ان کو مرض بھی نہ لگے، موجود نہیں ہیں، لیکن اب حالات کے بگڑنے کی وجہ سے N-95 ماسک پہننے کے علاوہ کوئی حل نہیں اور اس کے لیے داڑھی کٹوانا ضروری ہوتا ہے، اگر یہ چہرے پر نہ بیٹھے اور تقریبا اکثر اطباءکے چہروں پر جن کے داڑھی ہو، یہ نہیں بیٹھتا، تو ایسی مندرجہ بالا خرابیاں لاحق ہونے کا قوی گمان ہوتا ہے۔
یہ بات واضح رہے یہ عام ماسک نہیں ہے، بلکہ انتہائی حساس صورتوں (جن میں کورونا کے مریض شامل ہیں) میں استعمال ہوتا ہے اور اس کو چہرے پر بٹھانے کے لیے خاص ٹیسٹ(Fit test) ہوتا ہے، تاکہ یہ دیکھا جا سکے کہ کوئی جراثیم جسم میں تونہیں جارہا۔
ڈاکٹر کی جان بچانے کے لیے اس کی افادیت ثابت شدہ ہے اور داڑھی والے حضرات کے لیے اس کا کوئی متبادل بھی فی الفور موجود نہیں ہے۔
داڑھی والے ڈاکٹر حضرات نے بارہا تجربے کے بعد یہ دیکھا ہے کہ داڑھی ہوتے ہوئے ڈاکٹر اس خاص ٹیسٹ میں کامیاب نہیں ہو پاتا، اور اِس وقت تک تحقیق بھی یہی ہے۔
سوال کے ساتھ اطباء کے ہاں ماسک پہننے کا درست طریقہ کار اور احصائیات(Statistics)بھی منسلک ہیں۔
برائے مہربانی اس کا شرعی حل بتلا کر ثواب دارین حاصل فرمائیں۔

جواب: جواب سے پہلے بطور تمہید یہ بات سمجھ لینا چاہیے کہ داڑھی رکھنا واجب ہے اور داڑھی مونڈکر یا کترکر ایک مشت سے کم کرنا ناجائز اور گناہ کبیرہ ہے، البتہ درج ذیل قواعد اور نظائر کی روشنی میں ذکر کردہ مرض (Covid-19) میں بقدرِ ضرورت اور بوقتِ ضرورت داڑھی مونڈنے کی مشروط گنجائش معلوم ہوتی ہے:
(1) انسان پر اپنی جان کی حفاظت کرنا واجب ہے اور اپنے آپ کو مواقعِ عزیمت کے علاوہ قصداً ہلاکت میں ڈالنا ناجائز اور حرام ہے اور اسی وجہ سے انسان کا اپنے آپ کو قتل کرنا بھی ناجائز ہے۔
(2) اپنی جان بچانے کی خاطراضطراری یعنی انتہائی مجبوری کے حالات (بوقتِ ضرورت اور بقدرِ ضرورت) میں ممنوع کام کے ارتکاب کی گنجائش آیت مبارکہ سے ثابت ہے، جیسا کہ جان بچانے کے لیے فقہاء کرام نےحرام (خنزیر یا شراب) کھانے پینے کی مشروط اجازت دی ہے۔
(3) خواتین کا اپنے سر کے بال کاٹنا فقہاء احناف نے حرام فرمایا ہے، لیکن اگر شرعی ضرورت درپیش ہو، تو سر کے بال منڈوانے کی گنجائش ہے۔
(4) اسی طرح فقہ مالکی میں صراحت ہے کہ عام حالات میں داڑھی مونڈنا مثلہ ہے اور بدعت ہے، لیکن اگر ایسا زخم جس کی وجہ سے داڑھی منڈوانے کی ضرورت ہو تو ایسا کرنے کی گنجائش ہے۔
(5) داڑھی رکھنا عبادت ہے اور اللہ تعالیٰ کا حق ہے، جبکہ دوسروں کی جان بچانا اور اپنے ضرر سے محفوظ رکھنا بندوں کا حق ہے، اور بندوں کا حق (مذکورہ مسئلہ میں) اللہ تعالیٰ کے حق پر مقدم معلوم ہوتا ہے۔
چنانچہ مسئولہ صورت میں اگر واقعۃً اطباء کو اس مرض (COVID-19)میں اپنی جان کی حفاظت کے لیے مخصوص ماسک(N-95) کا استعمال کرنا طبی طور پر لازم قرار دیا گیا ہو، اور یہ مخصوص ماسک مسلمان ماہر اطباء کے بیان کے مطابق طبیب کی اس وقت تک حفاظت نہیں کرتا ہو، جب تک کہ وہ اچھے طریقہ سے چہرے کی جلد کے ساتھ چسپاں نہ ہوجائے، اور طبیب کو اس مخصوص ماسک کے ذریعہ اپنی جان کی حفاظت کرنے کے لیے داڑھی کا مونڈنا ضروری سمجھا گیا ہو، نیز اس ماسک کو لگانے سے طبیب، تشخیص کے لیے آنے والا شخص اور طبیب سے متعلق دیگر افراد کی جان کی یقیناً یا غالب گمان کی حد تک حفاظت ہو سکتی ہو، تو مندرجہ ذیل شرائط پائے جانے کی وجہ سے یہ گنجائش معلوم ہوتی ہے:
(1) یہ اجازت صرف ان اطباء کے لیے ہے، جو کورونا وائرس (Covid-19) کے مریضوں کوبراہ راست (f2f) خود دیکھ رہےہوں، یا جنہیں عوام میں اس بیماری کی تشخیص اور علاج کی ذمہ داری دی گئی ہو اور ان کا داڑھی کے ساتھ مخصوص ٹیسٹ (Fit Test) کامیاب نہ ہو۔
(2) اطباء کو فراہم کیے گئے مخصوص ماسک(N-95) کے علاوہ کوئی ایسا متبادل ماسک نہیں ہو، جس سے داڑھی کترنے کی نوبت نہ آتی ہو، یا موجود تو ہو(جیسا کہ PAPR ) لیکن وہ طبیب کی دسترس میں نہ ہو۔
(3) داڑھی کا صرف اتنا حصہ کتروایا یا منڈوایا جائے، جس سے مخصوص ماسک(N-95) پہننے کی ضرورت پوری ہوسکے۔
اگر مندرجہ بالاشرائط نہیں پائی گئیں، تو مقدارِ واجب سے کم داڑھی رکھنا ناجائز ہے۔
نوٹ: داڑھی منڈوانے یا کتروانے والا طبیب پکی نیت کرے کہ وباء کی وجہ سے واقع ہونے والی ضرورت ختم ہوتے ہی فوراً داڑھی کی واجب مقدار رکھے گا، نیز ایسے شخص کے لیے مناسب ہے کہ ساتھ ساتھ توبہ واستغفار بھی کرتا رہے۔