سوال: السلام علیکم، مفتی صاحب! اگر کسی شخص پر زکوۃ واجب ہو، اور اس کے گھر والے اس کی زکوٰۃ ادا کردیں، تو کیا اس طرح اس شخص کی زکوۃ ادا ہوجائے گی یا نہیں؟

جواب: جس آدمی پر زکوۃ واجب تھی، اگر اس کے گھر کے افراد نے زکوۃ کی نیت سے کسی مستحق آدمی کو رقم دیدی تو اس کی دو صورتیں ہیں، اگر مذکورہ صاحبِ نصاب آدمی نے پہلے سے اپنے گھر کے لوگوں کو زکوۃ ادا کرنے کی اجازت دیدی تھی تو اس صورت میں گھر کے لوگوں نے زکوۃ کی نیت سے جو رقم دی ہے، وہ زکوۃ میں ادا ہو جائے گی۔
اور اگر مذکورہ آدمی نے پہلے سے گھر والوں کو زکوۃ ادا کرنے کی اجازت نہیں دی تھی، اور گھر کے لوگوں نے زکوۃ کی نیت سے فقیر کو رقم دیدی، اور وہ رقم اب تک اس فقیر کے پاس موجود ہے، اس نے خرچ نہیں کی ہے اور مالک نے زکوۃ کی نیت کر لی تو نیت صحیح ہوگی، اور زکوۃ ادا ہو جائے گی، اور اگر وہ رقم فقیر کے پاس نہیں ہے، بلکہ اس نے خرچ کردی اور مالک نے اب زکوۃ کی نیت کی تو اس نیت کا اعتبار نہیں ہوگا، اور زکوۃ ادا نہیں ہوگی، البتہ صدقہ کا ثواب ملے گا۔