سوال: السلام علیکم، مفتی صاحب! کیا میں اپنا قرض جو میں نے ایک اپنے ضرورت مند دوست کو دیا تھا، اور اب وہ قرض واپس نہیں کر رہا، تو کیا میں اس قرض میں زکوۃ کی نیت کر سکتا ہوں؟ اور کیا اس طرح زکوۃ ادا ہو جائے گی یا نہیں؟

جواب: اگر کوئی آدمی قرض لی ہوئی رقم واپس نہیں کر پارہا ہو، اور واپسی کی امید بھی نہیں ہو، اب اگر قرض دینے والا قرض دی ہوئی رقم کو زکوۃ کی نیت کرکے چھوڑ دے، تو زکوۃ ادا نہیں ہوگی، کیونکہ زکوۃ کی ادائیگی کے وقت یا زکوۃ میں دیے جانے والے مال کو جدا کرتے وقت زکوۃ کی نیت کرنا ضروری ہے۔
البتہ قرض کی رقم کو زکوۃ میں شمار کرنے کا طریقہ یہ ہے کہ قرض دینے والا زکوۃ کی رقم مقروض کو پورے اختیار کے ساتھ قبضہ دے کر مالک بنا دے، پھر اس سے مطالبہ کر لے کہ میرے قرض کی رقم مجھے واپس کردو، چنانچہ اگر وہ مالک بن کر اپنی خوشی و رضا و رغبت سے قرض کی رقم کو واپس کردے تو اس طرح قرض بھی وصول ہو جائے گا اور زکوۃ بھی ادا ہو جائے گی۔