سوال: السلام علیکم، مفتی صاحب! کیا کوئی رفاہی ادارے والے زکوۃ کی مد میں رقم لے کر کسی مستحق مریض وغیرہ پر خرچ کرنا چاہیں، تو کیا وہ خرچ کر سکتے ہیں؟

جواب: واضح رہے کہ زکوۃ کی رقم کو مستحق زکوۃ کی ملکیت میں دینا ضروری ہے، جب تک مستحق کی ملکیت میں رقم دے کر ان کو با اختیار نہ بنادیا جائے، اس وقت تک زکوۃ ادا نہیں ہوگی، لہذا فلاحی اداروں کے لئے لازم ہے کہ وہ رقم کی حیثیت لازمی طور پر معلوم کرلیں، اگر زکوۃ کی رقم ہے تو اس کو کسی مستحق کی ملکیت میں دینا ضروری ہے، اس کو رفاہی کاموں میں براہ راست استعمال کرنا جائز نہیں ہے، اور اگر نفلی صدقہ ہے تو بلا تملیک اس کو رفاہی کاموں اور علاج و معالجہ وغیرہ تمام امور میں استعمال کرنا جائز ہے۔
زکوۃ کی رقم سے کوئی سامان خرید کر کسی مستحق کی ملکیت میں دینا بھی درست ہے، مگر ایسی چیز خریدنا جائز نہیں، جو کسی ایک مستحق کی ملکیت میں نہ آئے، لہذا ایمبولینس کی گاڑی وغیرہ زکوۃ کی رقم سے خریدنا جائز نہیں ہے۔