سوال: السلام علیکم، مفتی صاحب ! وقار احمد نے سن دو ہزار اٹھارہ میں ایک پلازہ کی دکان ستر لاکھ میں بک کروائی کہ قیمت بڑھے گی تو بیچ دوں گا، دو ہزار بیس تک پلازے کی بنیادوں کی کھدائی ہوئی ہے اور وقار احمد نے مبلغ چودہ لاکھ ایڈوانس رقم جمع کروائی ہے اور بقیہ رقم وقار احمد کے ذمہ ہے، رہنمائی فرمائیں کہ وقار احمد اس دکان کی کتنی زکوۃ ادا کریں گے؟

جواب: واضح رہے کہ مذکورہ صورت میں پلازہ کی دکان بک کروانا شرعا عقد استصناع ہے، جس میں بک کروانے والے(مستصنع) کا دکان پر باقاعدہ قبضہ ہوجانے سے پہلے وہ دکان، بنانے والے صانع کی ملکیت میں ہوتی ہے، بک کروانے والے کی ملکیت نہیں ہوتی، لہذا دکان پر قبضہ سے پہلے وقار احمد پر اس کی مالیت کی زکوة لازم نہیں ہوگی، چاہے دکان ذاتی استعمال کیلئے بک کروائی ہو یا آگے فروخت کرنے کے لئے، تاہم اس دکان کا باقاعدہ قبضہ ملنے کے بعد اس کی مالیت پر زکوة لازم ہوگی۔
نیز جو رقم ایڈوانس (بیعانہ) کے طور پر جمع کروائی گئی ہے، وہ چونکہ وقار احمد کی ملکیت سے نکل چکی ہے، اس لئے اس رقم کی زکوة بھی اس پر لازم نہیں ہوگی، البتہ دکان کی مد میں بقیہ جو رقم اس کے ذمہ واجب الاداء ہے، اس میں سے صرف ایک سال میں ادا کی جانے والی رقم (قسطیں) بقیہ اموال میں سے بطور قرض منہا کی جا سکتی ہیں۔