سوال: السلام علیکم، مفتی صاحب ! میں نے تقریباً گیارہ سال پہلے ایک زمین خریدی تھی اور اس پر فلیٹس بنا کر کرائے پر دینے کی نیت تھی، لیکن چونکہ میرے پاس مزید پیسے نہیں تھے، تو میں نے اپنے ایک دوست کو کہا کہ زمین میری اور فلیٹس کی تعمیرات کے پیسے تم دے دو اور پھر کرائے پر لگنے کے بعد جو بھی ماہانہ کرایہ آیا کرے گا، وہ ہَم آپس میں آدھا آدھا تقسیم کر لیا کریں گے، پھر ہوا یہ کہ تین تین کے دو سیٹ پر مشتمل چھ فلیٹس بن گئے، بعد میں ٹھیکیدار نے کہا کہ ہر سیٹ کے اُوپر ایک فلیٹ اور بنا لیں تو اِس طرح ٹوٹل آٹھ ہو جائیں گے،
لیکن مسئلہ یہ تھا کے اوپر چوتھی منزل بنانا قانوناً ممنوع تھا، لیکن پولیس والوں کو دس ہزار روپے دے کر اس علاقہ میں چوتھی منزل بھی بنائی جا سکتی تھی، چنانچہ ہم نے چوتھی منزل بنوا لی، اب پوچھنا یہ ہے کہ چوتھی منزل کا جو کرایہ آ رہا ہے وہ حلال ہے یا نہیں؟
اب چوتھی منزل کا کیا کریں، بنے رہنے دیں یا توڑ دیں؟
نیز یہ بھی بتائیں کہ پولیس والوں کو جو دس ہزار دیئے تھے اس کا کیا ہو گا؟
نوٹ:
واضح رہے کہ چوتھی منزل تعمیر کی جائے یا نہیں، پولیس والے دس ہزار ضرور لیتے ہیں۔

جواب: واضح رہے کہ حکومت کے وہ جائز قوانین جو مصلحت پر مبنی ہوں، ان کی اطاعت کرنا شرعا بھی ضروری ہے، لہذا
1) مذکورہ صورت میں اگر آپ کے علاقے میں فلیٹ پر چوتھی منزل (4th floor) بنانا قانونا منع ہو، تو اس کے باوجود اس کے بنانے سے حکومت کے جائز قانون کی خلاف ورزی کا گناہ ہوگا، البتہ اس منزل (Floor) سے حاصل ہونے والا کرایہ (Rent) حرام نہیں ہوگا، بشرطیکہ اس کے حرام ہونے کی کوئی اور وجہ نہ پائی جائے۔
2) حکومت کے قانون کے مطابق اس کا جو جائز طریقہ کار (Process) ہو، اس پر عمل کریں۔
3) اس مقصد کیلئے پولیس والوں کو دس ہزار روپے دینا رشوت کے زمرے میں آتا ہے، جو کہ ناجائز اور سخت گناہ ہے، اس سے بچنا لازم ہے۔