سوال: السلام علیکم، مفتی صاحب ! میری دوسری اہلیہ کے پہلے شوہر سے ایک بیٹا اور ایک بیٹی ہے، بیٹا جس کی عمر نو سال ہے اور اپنی نانی کے گھر رہتا ہے، ماں کی تحویل میں ہے اور باپ اس کی ذمہ داری نہیں اٹھاتا، اس تناظر میں سوال یہ ہے کہ وہ بچہ میرے پاس ہو یا اپنی نانی کے گھر میں ہو، کیا میں اس پر خرچ کی جانے والی رقم کو زکوة میں شمار کر سکتا ہوں؟

جواب: واضح رہے کہ اگر اس نابالغ بچے کا حقیقی والد صاحب نصاب نہیں ہے، اور اس بچے کے پاس ان زیورات کے علاؤہ مال تجارت اور ضرورت سے زائد نقدی رقم چاہے تھوڑی ہی کیوں نہ ہو، بھی موجود نہیں ہے، تو ایسی صورت میں اگر آپ زکوٰۃ کی نیت سے اس بچے کو پیسوں اور کھانے وغیرہ کا باقاعدہ مالک بنا دیتے ہے، تو وہ بچہ چاہے جس کے پاس بھی رہتا ہو، ان خرچ ہونے والے پیسوں کو آپ زکوٰۃ میں شمار کرسکتے ہیں، لیکن اگر آپ اس بچے کو زکوٰۃ کی نیت سے باقاعدہ ان اخراجات کا مالک نہیں بناتے بلکہ صرف استعمال کی اجازت دیتے ہیں، تو اس صورت میں ان اخراجات کو آپ زکوٰۃ میں شمار نہیں کرسکتے، نیز اس سے پہلے جو اخراجات آپ نے اس بچے پر خرچ کئے ہیں، اگر اس بچےکو آپ نے زکوٰۃ کی نیت سے ان اخراجات کا باقاعدہ مالک بنا دیا تھا، تو آپ ان اخراجات کو زکوٰۃ میں شمار کرسکتے ہیں، ورنہ نہیں۔