سوال: السلام علیکم، مفتی صاحب !
ہمارے امام صاحب کی عادت ہے کہ کسی بھی رکن سے دوسرے رکن میں جانے کے کچھ دیر بعد تکبیر کہتے ہیں، اس تناظر میں سوال یہ ہے کہ ایک شخص نے امام صاحب کو دیکھا کہ رکوع سے کھڑے ہونے کیلئے سر کو اٹھایا، لیکن سمع اللہ ابھی زبان سے ادا نہیں کیا تھا کہ وہ شخص جماعت میں شامل ہوگیا، تو کیا وہ بندہ مسبوق ہوا یا نہیں؟

جواب: واضح رہے کہ تکبیرات انتقالات ایک رکن سے دوسرے رکن منتقل ہوتے ہوئے کہنا چاہیے، رکن میں منتقل ہونے کے بعد تکبیر کہنا سنت کے خلاف ہے۔
امام رکوع کی حالت میں ہو اور کوئی مقتدی تکبیرِ تحریمہ کہہ کر امام کے ساتھ جماعت میں شامل ہو، تو اگر مقتدی نے امام کے رکوع سے سر اُٹھانے سے پہلے پہلے ایک لمحہ کے لئے بھی امام کو رکوع میں پالیا، تو وہ اس رکعت کو پانے والا سمجھا جائےگا، لیکن اگر امام رکوع سے اُٹھ رہا ہو اور مقتدی تکبیرِ تحریمہ کہہ کر رکوع میں جارہا ہو، تو مقتدی اس رکعت کو پانے والا شمار نہیں ہوگا۔