سوال: رہنمائی فرمائیں کہ کیا جڑی بوٹی "سنا مکی" کے حوالے سے کوئی حدیث موجود ہے؟

جواب: جی ہاں ! سنا مکی کے بارے میں حدیث موجود ہے :
عن أنس بن مالك، قال: قال رسول الله صلى الله عليه وسلم: «ثلاث فيهن شفاء من كل داء إلا السام السنا والسنوت» قال محمد: ونسيت الثالثة " قالوا: يا رسول الله، هذا السنا قد عرفناه، فما السنوت؟ قال: لو شاء الله لعرفكموه»۔
( السنن الكبري للنسايي، حديث نمبر: 7533 ، ط: مؤسسة الرسالة )
’’تین چیزوں میں سوائے موت کے ہر مرض کے لیے شفاء ہے، سنا مکی اور سنوت۔ راوی (محمد )فرماتے ہیں کہ میں تیسری چیز بھول گیا ہوں۔ صحابہ رضی اللہ عنہم نے کہا: یا رسول اللہ ! سنا مکی کو تو ہم پہچان چکے ہیں، یہ سنوت کیا چیز ہے؟ آپ صلی اللہ علیہ وسلم نے فرمایا کہ اگر اللہ تعالی چاہتے تو تمہیں بتادیتے۔
واضح رہے کہ سنا مکی کے ذریعے کس بیماری کا کس طریقے سے علاج ہوگا؟ یہ اس فن سے واقف لوگ ہی بہتر انداز سے بتا سکتے ہیں، کیونکہ حدیث شریف میں صرف اس سے مریض کو شفا ملنے کا تذکرہ ہے، مزید طریقہ استعمال کی تفصیل نہیں ہے۔
نیز دوا کے فائدہ مند یا مضر ہونے کا مدار لوگوں کے مزاج و طبائع، علاقے، آب و ہوا اور دوا کی مقدار پر ہوتا ہے، لہذا کسی مستند طبیب کے مشورے سے ہی ایسی اشیاء کا استعمال کرنا چاہیے۔