سوال: مفتی صاحب ! dropshipping کے طریقے سے کاروبار کرنا کیسا ہے؟
اس میں یہ ہوتا ہے کہ مثلاً زید کو کسی چیز کی ضرورت ہے، بکر زید سے چیز کی قیمت طے کر کے معاملہ کر لیتا ہے، حالانکہ بکر کے پاس وہ چیز نہیں ہوتی ہے، بلکہ وہ چیز عمر کے پاس ہوتی ہے، بکر عمر سے وہ چیز کم قیمت پر خریدتا ہے اور اس سے کہتا ہے کہ یہ چیز زید کے پتے پر ارسال کر دو، تو اس طرح کاروبار کرنا کیسا ہے؟

جواب: سوال میں ڈراپ شپنگ( drop shipping) کے کاروبار کا جو طریقہ بیان کیا گیا ہے، یہ بیع قبل القبض (قبضے سے پہلے فروخت کرنا) کی صورت ہے، جو کہ شرعا جائز نہیں، احادیث مبارکہ میں اس سے ممانعت وارد ہوئی ہے، البتہ درج ذیل صورتوں میں سے کوئی صورت اختیار کرلی جائے، تو یہ کاروبار جائز ہوسکتا ہے:
1) گاہک کو مطلوبہ چیز (Product) فروخت کرنے سے پہلے بکر، فروخت کنندہ (Seller) سے وہ چیز خرید لے، خریدنے کے بعد اگر بکر کیلئے خود اس پر قبضہ کرنا مشکل ہو، تو عمرو (Seller) کے علاوہ کسی اور کو اپنا وکیل اور نمائندہ بنائے، جو اس کی طرف سے اس چیز پر قبضہ کرلے، اس کے بعد بکر اپنے گاہک (زید) کو وہ چیز فروخت کردے، تو اس طریقہ سے خرید وفروخت کا معاملہ درست ہوجائے گا۔
2) دوسری صورت یہ ہے کہ بکر فروخت کنندہ (Seller) /عمر کا ایجنٹ بن کر اس کی چیز فروخت کردے، اور فروخت کنندہ سے اس طرح اجرت طے کرے کہ فی آئٹم بیچنے پر مثلا سو روپے متعین اجرت ہوگی، تو اس طریقہ سے بھی خرید و فروخت کا معاملہ درست ہوجائے گا۔