سوال:
مفتی صاحب ! ایک امام جو زکوٰة کا واقعتاً مستحق ہے اور اہل محلہ اسے تنخواہ دینے کی استطاعت نہیں رکھتے، چونکہ محلے والوں کے صرف باغات ہیں، کوئی اور کاروبار بھی نہیں ہے، تو کیا وہ امام مسجد کو انہیں باغات کی زکوة دے سکتے ہیں؟
جواب: واضح رہے کہ زکوٰة کی رقم کسی چیز یا خدمت کے عوض کے طور پر دینا جائز نہیں ہے، لہذا امام صاحب کو تنخواہ کے طور پر زکوٰة دینا جائز نہیں ہے، بلکہ تنخواہ کی ادائیگی الگ سے کرنی ہوگی، خواہ وہ پیسوں کی صورت میں ہو یا متعین اجناس کی صورت میں، باہمی رضامندی سے کوئی بھی صورت طے کی جاسکتی ہے۔
نیز اگر امام صاحب مستحق زکوٰة ہوں، تو انہیں تنخواہ یا کسی چیز کے معاوضے کے بغیر، زکوٰة دی جاسکتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الهندية: (کتاب الزکوٰۃ، 170/1، ط: دار الفکر)
اما تفسيرها فهي تمليك المال من فقير مسلم غير هاشمي، ولا مولاه بشرط قطع المنفعة عن المملك من كل وجه لله تعالى
البناية شرح الهداية: (باب من یجوز دفع الصدقات و من لایجوز، 450/3، ط: دار الکتب العلمیة)
(ولهذا يأخذ وإن كان غنيا) ش: أي ولأجل استحقاقه بطريق الكفاية لأجل عمله يأخذ العامل، وإن كان غنيا لأن ما يأخذه هو عوض عن عمله والزكاة لا تجوز أن تدفع عوضا عن شيء.
مرقاۃ المفاتیح: (باب فضل الصدقة، 338/4)
(الصدقۃ) ہي ما یخرجہ الإنسان من مالہ، علی وجہ القربۃ واجباً کان أو تطوعاً
واللہ تعالٰی اعلم بالصواب
دارالافتاء الاخلاص،کراچی