سوال: مفتی صاحب ! ہمارے محلہ کی مسجد چند سال قبل ہی جامع مسجد ہوئی ہے، اس وقت جو ہمارے خطیب تھے, انھوں نے کہا کہ جمعہ کی دوسری اذان (جو خطبہ سے پہلے ہوتی ہے) کا مسجد کے باہر دینا مسنون ہے، تب سے آج تک خطبہ سے پہلے والی اذان وضو خانے میں کھڑے ہو کر دی جاتی ہے، بعض اوقات بغیر لاؤڈ سپیکر کے پڑھی جاتی ہے اور بعض اوقات وہاں تک مائک پہنچایا جاتا ہے، جس کی وجہ سے عجیب بد نظمی کی صورت حال بن جاتی ہے، کچھ لوگوں کا خیال ہے کہ جمعہ کی دوسری اذان خلیفہ سوئم حضرت عثمان غنی رضی اللہ عنہ کے دور میں شروع کی گئی، چونکہ مدینہ منورہ کی آبادی زیادہ ہو گئی تھی اور دور تک پہلی اذان کی آواز نہ پہنچ پاتی تھی، جس کی وجہ سے کئی لوگوں نے اس کی شکایت کی، تو حضرت عثمان غنی رضی اللہ عنہ نے باہر بازار میں دوسری خطبہ کے لیے اذان دینے کا حکم صادر فرمایا، بعض دوستوں کا خیال ہے کہ یہ خالص انتظامی معاملہ ہے اور اذان کی روح ہی یہی ہے کہ زیادہ سے زیادہ لوگوں تک آواز پہنچے اور لاؤڈ سپیکر کے دور میں اس چیز سے کوئی فرق نہیں پڑتا کہ اذان مسجد کے اندر کھڑے ہو کر دی جائے یا باہر، جب کہ کچھ دوست اس بات پر بضد ہیں کہ چونکہ خطیب صاحب نے کہہ دیا تھا اور چونکہ انہوں نے اس حوالے سے کسی فتوے کا بھی ذکر کیا تھا، تو جمعہ کی دوسری اذان وضو خانے میں ہی دی جائے گی، برائے مہربانی اس حوالے سے رہنمائی فرمائیں کہ بہتر صورت کیا ہے؟

جواب: واضح رہے کہ جو اذان جمعہ کے خطبے سے پہلے منبر کے سامنے کھڑے ہو کر دی جاتی ہے، جناب نبی اکرم صلی اللہ علیہ وسلم، حضرت ابوبکر صدیق اور حضرت عمر فاروق رضی اللّٰہ عنہما کے زمانے تک جمعہ کی یہی ایک اذان ہوتی تھی، پھر خلیفہ سوم حضرت عثمان رضی اللہ عنہ کے زمانے میں آبادی بڑھنے کی وجہ سے، ایک اور اذان کی ضرورت محسوس کی گئی، جس کے لیے انہوں نے "زوراء" نامی مقام سے اذان دینے کا حکم دیا، یہ وہ اذان ہے، جو آج کل جمعہ کی پہلی اذان کہلاتی ہے، اس پر صحابہ میں سے کسی نے کوئی نکیر نہیں فرمائی، اس طرح اس اذان پر امت کا اجماع ہو گیا۔
نیز واضح رہے کہ اذان کا بنیادی مقصد ہے کہ زیادہ سے زیادہ لوگوں تک یہ آواز پہنچانا کہ جماعت قائم ہونے والی ہے، قدیم زمانے میں اس مقصد کے لیے مسجد کے باہر اونچی جگہ مینارہ وغیرہ پر اذان دی جاتی تھی، جبکہ آج کل عام طور پر لاوڈ اسپیکر میں اذان دی جاتی ہے، چنانچہ مسجد میں اذان دی جائے یا مسجد سے باہر، بہر صورت آواز دور تک پہنچ جاتی ہے، نیز جمعہ کی دوسری اذان اقامت کی طرح ہے، گویا حاضرینِ مسجد کو اطلاع دی جارہی ہے، کہ اب خطبہ جمعہ کے لیے تیار ہو جائیں، نفل، تسبیح، تلاوت وغیرہ موقوف کر دیں، لہذا یہ اذان خطیب کے سامنے پہلی صف میں یا نمازیوں کی تعداد کو مد نظر رکھتے ہوئے، کہ سب تک آواز پہنچ جائے، مسجد میں دینا مسنون ہے، فقہاء کی تصریحات یہی ہیں کہ امام اور منبر کے سامنے اذان ثانی دی جائے، صحابہ کرام رضوان اللّٰہ علیہم اجمعین کے زمانے سے لیکر، اب تک تواتر و توارث کے ساتھ علماء امت کا اسی پر عمل چلا آرہا ہے، لہذا اس کو وجہ نزاع بنانا ناپسندیدہ ہے۔