سوال: مفتی صاحب ! میں ایک اسکول میں ملازمت کرتا ہوں اور پڑهانے کیلیے اپنی محنت سے اپنے نوٹس تیار کرتا ہوں، جس میں میرا ذاتی تجربہ اور مضمون کی مہارت بهی شامل ہوتی ہے، یہ نوٹس میں بچوں کو معاوضہ پر فروخت کرتا ہوں، جس کا علم انتظامیہ کو بهی ہے۔
اب اس سال انتظامیہ کا اصرار ہے کہ آپ اپنا سارا تحریری مواد ہمیں دے دیں، ہم اس میں اپنا نام بهی شامل کر کے بچوں کو فروخت کریں گے اور اس میں میرا کوئی حصہ نہیں ہو گا۔
میں دینا نہیں چاہتا ہوں، کیونکہ اس میں میری ذاتی محنت اور مہارت شامل ہے، لیکن اگر نہیں دیتا تو انتظامیہ کی ناراضگی یا نوکری سے نکالے جانے کا خطرہ ہے، اس تناظر میں سوال یہ ہے کہ کیا انتظامیہ کا یہ عمل درست ہے؟

جواب: واضح رہے کہ آپ کی انتظامیہ کا یہ عمل کسی طور درست نہیں ہے، اسلامی نقطہ نظر سے کسی کی تحریر کو بعینہٖ اس کی اجازت کے بغیر استعمال کرنا شرعاً اور اخلاقاً صحیح نہیں ہے، کیونکہ کسی دوسرے کی تحریر بعینہٖ لے کر اپنے نام سے منسوب کرنا دھوکہ ہونے کے ساتھ ساتھ (معنوی) چوری کے حکم میں ہے۔
البتہ صورت مسؤلہ میں اگر انتظامیہ ان نوٹس میں آپ کا حوالہ دیتی ہے، اور آپ کی اجازت سے ان نوٹس کو فروخت کرتی ہے، تو ان کے لئے نوٹس فروخت کرنا جائز ہوگا۔