سوال: مفتی صاحب ! قربانی کے جانور وزن کے حساب سے بھی ملتے ہیں، کیا اس طرح وزن کر کے قربانی کے جانور خریدنا جائز ہے؟
جزاک اللہ

جواب: جانور کو وزن کرکے خریدنا اور بیچنا شرعاً جائز ہے، بشرطیکہ متعین جانور کا فی کلو کے حساب سے نرخ طے کرلیا گیا ہو، نیز جانور کا وزن کرنے کے بعد اس کی قیمت بھی متعین کر لی گئی ہو، جس کی صورت یوں ہوگی کہ خریدار کو مثلاً ایک بکرے کی ضرورت ہے، تاجر کے پاس جا کر وہ بکروں میں سے ایک بکرا منتخب کر لیتا ہے اور تاجر اس کو بتا دیتا ہے کہ اس بکرے کی قیمت پچاس روپے فی کلو ہے اور اس بکرے کو خریدار کے سامنے وزن کرکے بتا دیتا ہے کہ مثلاً یہ بیس کلو کا ہے، اب اگر خریدار اس کو قبول کرلے، تو بیع منعقد ہو جائے گی اور اس طرح کی گئی خرید و فروخت شرعاً جائز ہے۔