سوال: ایک عیسائی عورت جو اب مسلمان ہو چکی ہے، اس نے سوال کیا ہے کہ ایک مسلمان عورت نقاب کیوں کرتی ہے ؟ وہ سوچتی ہے کہ نقاب چہرے کے آگے رکاوٹ ہے، قرآن وحدیث کی روشنی میں وضاحت فرما دیں۔

جواب: عورت کےلئے پردے کا حکم قرآن کریم کی سات آیات اور ستراحادیث مبارکہ سے ثابت ہے اور اس حکم کامقصد بےحیائی، فحاشی اور بدکاری کی روک تھام ہے، کیونکہ یہ فتنہ انسانی سوسائٹی کے لئے زہر قاتل اور بربادی کا ذریعہ ہے، اس وجہ سے شریعت نے اسلامی سوسائٹی کو بےحیائی کے تمام ذرائع سے بچانے کے لئے پردے کا حکم دیا اور چونکہ عورت کا چہرہ تمام محاسن کا مجموعہ اور تمام زینتوں کا منبع ہے، اگر باقی بدن چھپا ہوا ہو اور صرف چہرہ ہی کھلا ہوا ہو تو اسلامی سوسائٹی میں بے حیائی اور فحاشی پھیلنے سے کیا چیز مانع ہوسکتی ہے، خصوصاً اس موجودہ دور میں اس فتنے سے حفاظت کس طرح ممکن ہے، جبکہ نیکی اور بدی کے درمیان تمیز اٹھ چکی ہے، دل پلٹ چکے ہیں، بے حیائی قابل فخر ہے اور بے پردگی قابل ستائش و تعریف، اس لئے عورت کے لئے چہرے کا پردہ بھی فرض ہے۔