سوال: مفتی صاحب ! کیا مرد کے لیے "بوسکی کپڑا" (جس میں ریشم استعمال ہوتا ہے) پہننا جائز ہے؟
جو لوگ یہ کپڑے بنا رہے ہیں، ان میں سے کچھ (%100 spun silk) لکھتے ہیں، مطلب یہ کہ یہ ریشم کے دھاگے سے بنا ہوا ہے، جب کہ کچھ لوگ (blended) بیچ رہے ہیں، جس میں کچھ حصہ ریشم اور کچھ کاٹن کا ہوتا ہے۔

جواب: ہماری معلومات کے مطابق اس وقت مارکیٹ میں ’’بوسکی‘‘ کے نام سے منسوب کئی قسم کے کپڑے فروخت کیے جارہے ہیں، جن میں سے بعض کی تیاری میں خالص ریشم ہی استعمال ہو رہا ہے اور بعض کا بانا خالص ریشم کا ہے اور بعض مخلوط دھاگے سے تیار کیا جارہا ہے۔
عموماً ’’بوسکی‘‘ کپڑا مصنوعی (آرٹیفشل) ریشم سے ہی تیار کیا جارہا ہے، اگرچہ اسے خالص ریشم سمجھا جاتا ہے، لہٰذا ’’بوسکی‘‘ کپڑے کو مطلقاً ریشم نہیں کہا جاسکتا، مگر یہ کہ کسی کپڑے کے بارے میں تحقیق سے ثابت ہوجائے کہ اس میں اصلی ریشم استعمال کیا گیا ہے۔
پس اگر "بوسکی کپڑا" خالص قدرتی ریشم سے بنا ہوا نہ ہو، تو مردوں کے لیے اس کا استعمال کرنا جائز ہے، اور اگر اصلی ریشم سے بنا ہوا ہو، تو اس صورت میں اگر تانا بانا دونوں ریشم کے ہوں یا بانا ریشم کا ہو، تو ایسا کپڑا مردوں کے لیے پہننا حرام ہے۔